一波未平一波又起，港府施政混亂，烏龍百出，糊塗帳數極都唔完。呢，高鐵醜聞呢筆仲未搞掂，盛事基金嗰筆又燒到嚟，而且愈揭愈臭。港產官僚大事做唔到，小事做唔好，搞到盛事變醜事，問你服未！
盛事基金被審計報告踢爆監管不力，帳目不清，立法會議員緊咬唔放，議事堂上炮聲隆隆。有議員批評基金運作明益自己友，例如香港龍獅節，當局任由負責人篤數作大就業人數，瞞報利益，用剩嘅錢又唔使退還；亦有議員質疑，廉署防貪委員會一○年已建議停止基金運作，顯然察覺到有問題，但港府當成耳邊風，仲喺一二年向財委會申請加碼注資添。
嗱，睇吓市民有乜反應。「東方報業民意調查」顯示，政府對廉署建議停止基金運作隻字不提，四成五受訪者斥基金被濫用，浪費公帑；兩成七直指涉刻意隱瞞；兩成一認為選擇性披露資料。對於龍獅節帳目唔清唔楚，又未能創造就業，四成八指政府監管混亂，不聞不問；兩成四批評審批撥款欠透明，不嚴謹；兩成一斥盛事基金成效不彰。
好明顯，盛事基金千瘡百孔，既未能創造就業，又推廣唔到香港，只係淪為「分豬肉」嘅平台。好似舊年資助八百萬元舉辦嘅傑志對曼聯足球賽咁吖，唔止一半門票被扣起益自己友，仲爆出「爛球場」呢單大醜聞，搞到香港淪為國際笑話，弄巧反拙。仲有呀，有啲獲得私人機構冠名贊助嘅活動，盛事基金竟然資助埋一份，等於為他人作嫁衣裳，你話係咪慷納稅人之慨吖？
最好笑嘅係，當局仲死雞撐飯蓋，一時話創造就業並非批出基金嘅首要考慮原因，一時又話基金運作時日尚短，經驗不足，先至會出現咁多蝦碌喎。總之千錯萬錯，都係社會嘅問題，港產官僚一定冇錯。不過咁，公道自在人心，上述民調顯示，三成九受訪者批評當局監管不力，審批馬虎；另三成九斥盛事基金淪為提款機；一成九指監督制度不完善。
所以話，港產官僚食嘢唔做嘢，做嘢打爛嘢，審計署報告促請當局制訂機制，監察盛事基金，都係嘥氣嘅咋。對於盛事基金嘅存在價值，四成二受訪者指應停止盛事基金；三成四認為應加強監管及收緊審批標準；一成八斥刺激經濟目的與現況不符。
冇錯喇，港府搞盛事基金，無非為咗推介香港，吸引旅客啫，家陣已經有人嫌旅客太多，搞到又要「驅蝗」，又要「拖篋」，仲使乜推介吖。計功夫茶話齋，多隻香爐多隻鬼，盛事基金添煩添亂，與其繼續浪費公帑，不如索性摺埋佢，咁咪一了百了囉！