俗語話，大菌食細菌，細菌當補品。講就輕鬆咯，但聽吓好喇，千祈唔好真係將細菌當補品吖，尤其係藥物受到細菌污染，食落肚分分鐘搞出人命。所以話啫，藥物把關非常重要，絕對唔可以求求其其。
功夫茶唔係講笑o架。大家應該仲記得，○九年本港曾經發生痛風藥物別嘌醇被毛霉菌污染事件，導致最少八名癌症病人服藥後死亡。事件揭發衞生署對藥廠監管甩甩漏漏，千瘡百孔，病人生命健康毫無保障，當局事後亡羊補牢，煞有介事成立藥物管理制度檢討委員會，提出七十五項改善建議，當中十六項需要修例配合。
嗱，新修訂嘅《藥劑業及毒藥（修訂）條例草案》就係其中一項喇，該草案已於三月底通過一讀及二讀，短期內將進入三讀嘅最後立法階段，點知當中新加入嘅「獲授權人」註冊制度惹起極大爭議，最後可唔可以順利通過，仲係未知之數。即係咁，現時本港所有藥廠都要聘用藥劑師作為「守尾門」嘅角色，而且要簽署先可以出售，否則有起事上嚟，唔止藥廠唔掂，藥劑師亦要「上身」。呢個把關制度雖然亦有甩漏，但大致上總算行之有效。
好嘞，依家要改善藥物安全，本來應該加強把關至係，點知當局竟然本末倒置，新例規定只要持有指定課程資格人士就可註冊成為「獲授權人」，換言之，就算唔係註冊藥劑師，一樣可以做把關工作，你話係咪開倒車吖？
咁做有乜問題呢？藥劑師工會係咁講嘅，藥劑師最少要讀四年本科課程加一年實習先可以註冊，仲要計算年資至有機會獲藥廠聘用。新例通過後，藥廠只要派遣非專業人員或一般職員報讀相關課程就可以成為「獲授權人」，完全唔使考慮經驗及年資，而且自己人監督自己人，欠缺獨立性，就算藥物品質未必合格，都可以蒙混過關。而立法會議員就指出，當局咁做只會令問責制度崩潰，繼而影響藥物質素，隨時重演毛霉菌事件。
冇錯嘞，監管藥物開倒車，簡直攞病人條命嚟較飛。最奇怪嘅係，呢條關乎每個病人切身利益嘅修訂草案，多數市民居然一無所知，而藥劑師工會多次向當局反映憂慮，港產官僚總係左耳入右耳出，一於闊佬懶理。唔怪得有人質疑，當局向藥廠大開方便之門，係咪有不可告人嘅秘密。
一句到尾，藥物安全關乎人命，把關寧緊勿鬆。如果當局一意孤行開倒車，不如由港產官僚做白老鼠，試過所有藥物安全之後至准許出售，咁起碼都叫造福病人吖，係咪！