香港嘅貧富懸殊問題非常嚴重係人都知，唔知嘅只係具體數據，到底何謂窮人？究竟人數幾多？
特區政府終於破天荒公布有史以來第一條官方貧窮線，身兼扶貧委員會主席嘅政務司司長林鄭月娥表示，貧窮線定於家庭入息中位數嘅一半，採取嘅係易於量度並且有一定國際可比性嘅「相對貧窮」概念。根據二○一二年統計數據，香港有一百三十一萬二千人生活於貧窮線之下，扣除稅務同現金福利之後，貧窮人口就跌至一百零二萬，貧窮率係百分之十五點二，貧窮戶有四十萬。
以去年水平計算，一人家庭嘅貧窮線訂於月入三千六百元，二人家庭係七千七百元，三人家庭係一萬一千五百元，四人家庭係一萬四千三百元，五人家庭係一萬四千八百元，六人及以上家庭係一萬五千八百元。
其他數字請恕功夫茶唔同大家囉囌，有興趣嘅讀者煩請揭去相關嘅新聞版面。功夫茶今日主要想講嘅係，其實住屋問題直接影響貧窮比率。如果將綜援以及公屋住戶所得嘅福利轉移計算，貧窮人口馬上減少至六十七萬四千幾人，貧窮比率勁減九點五個百分點。換言之，如果話有得住公屋嘅低收入階層係窮人，冇得住公屋嘅低收入階層就係超級窮人！
既然公屋發揮到咁大作用，政府若然有心扶貧，係咪應該大興土木建造更多公屋安置窮等人家呀？原則上當然係咁啦，好衰唔衰香港曾經有一個漠視窮人需要嘅特首，淨係貪威識食傍實富豪吃喝玩樂，扶貧工作懶得就懶。呢一個罪大惡極嘅過氣特首，咪就係貪遍海陸空嘅曾蔭權囉！
貪曾禍港，真係唔講得笑o架，佢為窮人造成嘅禍患，首先係宣布扶貧委員會英年早逝執笠大吉，其次係將公屋嘅興建速度大大放緩，結果係排隊上樓嘅人龍打蛇餅，窮苦大眾唔知等到何年何月先至能夠有覺好瞓。
扶貧委員會係香港第一任特首董建華喺○五年成立嘅，由當時嘅財政司司長唐英年出任主席。你知啦，崩口人忌崩口碗，英年哥哥最怕聽到早逝兩字，點不知曾蔭權上台兩年之後，竟然話扶貧委員會已經完成歷史任務，夾硬下令解散喎，即係逼人早逝。好明顯，唐英年敗選特首有少少被詛咒嘅成分。扶貧委員會鹹魚翻生係梁振英當選特首之後嘅事，務求減輕貪曾禍港嘅傷害性。
至於公屋單位落成量，貪曾禍港期間當然係乏善足陳啦，否則迫於無奈入住劏房嘅小市民唔會愈來愈多。尤其令人氣憤嘅係，貪曾好大口氣講過「香港唔存在冇瓦遮頭問題」。
點都好啦，貪曾累死窮人嘅時代已經終結，望就望現屆政府收拾爛攤子，切實做好扶貧工作挽救窮人！