「老吾老以及人之老」，呢句說話係人都識講，可惜說易行難，尤其喺香港，隨着人口不斷老化，老人問題愈演愈烈，港府束手無策，安老無計，一味小修小補，小恩小惠。呢，廣東計劃就係其中之一嘞。
所謂廣東計劃，即係畀長期居住於廣東嘅香港長者毋須每年返港，亦可領取每月一千一百多元生果金。計劃籌備經年，尋日正式實施，好多老人家望穿秋水，終於等到呢一日。可惜，等得到亦未必好，而且隨時谷住道氣添吖。
本來呢，遲到好過冇到，有計劃好過冇計劃，每月千零蚊生果金雖然唔算多，但幫補吓生計，總算聊勝於無。弊就弊在港產官僚做嘢甩甩漏漏，永遠唔識得為老人家着想，搞到計劃啱啱實施就問題多多，怨聲四起。
話說廣東計劃總共收到一萬三千幾宗申請，對於估計三萬幾名長住廣東嘅長者嚟講，都算幾踴躍嘅。問題係當局尋日開始約見已登記嘅長者，而每日名額只有八十個咁大把，換句話講，有啲老人家可能要等八個月至可以獲得約見辦手續，你話係咪離譜吖？雖然當局承諾補發等候期間嘅生果金啫，但好多老人家風燭殘年，為咗區區生果金，居然要同政府鬥長命，講起都可悲，當局究竟敬老定虐老㗎？
仲有吖，當局規定生果金需要透過銀行自動轉帳過戶，即係擺明為難老人家啫。係人都知，好多移居內地嘅老人家冇本港銀行戶口，就算依家想開戶，亦因為缺乏本港住址證明而被拒絕，搞到無所適從。當局話喎，若長者無戶口或無法開戶，可透過香港親友嘅戶口代收，若長者喺香港無親無故，當局會委託國際社會服務社作為轉介機構，將生果金發放畀長者。 唉，又代收又轉介，仲有冇麻煩啲吖？點解當局唔諗辦法幫老人家開設戶口呢？唔通咁簡單嘅事都做唔到？
所以話，港府眼高手低，志大才疏，好事都變成壞事喇。廣東計劃被吹到好似一項德政咁，其實除咗廣東之外，亦有唔少長者移居內地其他省份，當局厚此薄彼，製造不公，咁又點算係德政吖！
講到底，廣東計劃只係敷衍民意嘅小恩小惠，相對於不斷惡化嘅老人問題，根本止唔到咳。嗱，本港三個長者就有一個貧窮，唔少人老無所依，老無所養，晚景淒涼，咪就係因為港府一味小修小補，缺乏完整嘅安老政策囉。計功夫茶話齋，要真正解決老人問題，唯一辦法就係盡快推行全民退休保障制度，只要人人得到保障，個個生活無憂，好多老人問題自然迎刃而解。前朝政府蹉跎歲月，漠視老人問題，現屆政府係時候撥亂反正嘞，千祈唔好再扮鴕鳥呀！