唔經唔覺又到旅遊旺季「十一」黃金周，業界磨刀霍霍準備掘金，你估今年會唔會出現惡導遊辱罵旅客？會唔會又爆出劏客醜聞？本來呢，零團費歪風搞到旅遊業亂象叢生，內地當局亡羊補牢制訂旅遊法，定喺下月一日實施，係威係勢，可惜，法例居然留咗一條尾巴，未實施已被譏為「無牙老虎」，真係搞笑。
係咁嘅，旅遊法針對旅行社劏客問題訂出多項措施，其中最到肉嘅係嚴禁旅行社安排旅客到指定店舖購物。正所謂，購物，購物，多少醜聞假汝之名而行。劏客購物團係旅業亂象嘅主要根源，一日唔禁止，惡導遊辱罵旅客事件就會繼續發生，激死旅客悲劇亦分分鐘會重演，所以咯喎，為咗清除旅業歪風，為咗保護香港「旅遊之都」招牌，杜絕劏客購物團實在有必要嘅。
只可惜，內地當局畫蛇添足，冇嗰樣整嗰樣，結果弄巧反拙。原來旅遊法居然訂明，如果旅行社及旅客雙方同意或者旅客要求，就可以繼續辦購物團。唉，咁即係嘥氣啫，新例留低咁大灰色地帶，不良旅行社肯收斂至奇啦，經營劏客購物團已經夠晒搵笨，以後仲可以名正言順打正招牌劏客，旅遊業唔亂上加亂至奇吖！
正如古人話齋，世不患無法，而患無必行之法。內地當局既然制訂旅遊法，打擊旅業劏客歪風，點解唔做得徹底啲，將劏客購物團趕盡殺絕呢？依家做啲唔做啲，留低一條大尾巴，隨時捉蟲o架。係人都知，內地奸商創意無限，做黑心食品能夠以假亂真，辦黑心購物團一樣真假難分，略施小計就可以瞞天過海，到時旅遊法變成一紙空文，所謂旅行社唔可以辦廉價團，旅客有權拒絕旅遊經營者嘅強制交易行為，盞嘥氣嘅咋。嗱，有旅行社已經講明，日後會繼續舉辦購物團，簡直當旅遊法透明。
旅遊有法如無法，如何杜絕亂劏客？旅遊業係本港經濟支柱之一，好多人靠佢食飯，如果劏客醜聞禁之不絕，「旅遊之都」變成「劏客之都」，到時至補鑊就遲嘞。內地同胞來港旅遊唔應該畀人賣豬仔，港產官僚返工更加唔可以魂遊太虛，唔該快快諗計，防止不法旅行社繼續劏客啦！
話時話，做生意最重要明碼實價，童叟無欺，內地當局聲稱以旅遊法杜絕旅行社劏客行為，出發點無疑係好嘅，可惜兜咗一個大圈之後又返到原地，法例似有還無，咁咪即係當大家係羊牯！