曾經爆出見死不救醜聞嘅明愛醫院，最近又發生醫療事故，不幸中之大幸係病人並未受到致命傷害，不過已經遭逢皮肉之苦，同時嚇到花容失色。大家嘗試幻想一下，一支針，插在心，你話係幾咁得人驚吖！
未入正題之前，功夫茶想向食衞局局長高永文送上一個溫馨提示。即係咁，港大民意調查顯示，以梁振英為首嘅特區管治班子民望持續低迷，CY嘅個人民望更加係慘不忍睹嘅負數，唯獨係高永文鶴立雞群，民望淨值竟然高到有八十個百分比咁多，創下有史以來所有局長嘅最佳成績。由於高局長民望實在高，所以有人膽粗粗估計佢係下任特首嘅黑馬之選。功夫茶嘅溫馨提示就係，高永文千祈唔好任由醫療事故繼續發生呀，否則民望有機會高台跳水o架！
好嘞好嘞，言歸正傳，究竟明愛醫院搞乜鬼呢？件事係咁嘅，有一位二十七歲女子呂嘉敏，同朋友飲酒歡聚之後醉倒，朋友發覺佢身體抽搐，所以將佢送去明愛醫院急症室。入院經過檢查之後確診，呂嘉敏胰臟同血液有菌，並且心瓣發炎，必須接受四周靜脈注射抗生素治療，期間轉送至復康病房。
抗生素治療要每四小時注射一次，所以護士喺病人手臂「種豆」，即係靜脈注射咁解。上月三十日呂嘉敏感到痛楚，發現種豆嘅針口有漏水情況，護士將導管拔走嘅時候懷疑折斷針頭，二點五厘米長嘅針頭遺留喺呂嘉敏手臂血管之內，有機會經血液游走，最終進入心臟或肺部。
講到呢度，大家係咪已經覺得事態嚴重呢？護士折斷一支針，隨時插在病人心，聽到都打冷震啦。醫生知道情況之後大為緊張，決定立即安排呂嘉敏去外科手術室局部麻醉，以X光同超聲波掃描尋找針頭位置。醫生跟住再為佢全身麻醉檢查，終於搵到已經游到手臂深處嘅針頭，最後冒險做全身麻醉取出。
呢件事係就係叫做有驚無險，不過當事人早就嚇到三魂唔見七魄。喂，一次局部麻醉都唔夠，仲要整多劑全身麻醉，好鬼死傷身o架，難怪呂嘉敏話家陣見到針都驚！
歌星藝人上台獻技忽然騰騰震，俗稱發台瘟，醫生護士雞手鴨腳出現失誤情況，不妨稱之為發醫瘟。所以功夫茶奉勸高永文一句，既然閣下係香港醫療一哥，咁就有責任確保唔再有醫療失誤，尤其係明愛醫院，以後唔准發醫瘟！
高局長呀高局長，民望呢家嘢變幻莫測o架，睇下前特首曾蔭權就知啦，佢上任之初民望高到天下無敵，卸任之時民望殘過風捲殘雲，驕兵必敗咪就係咁解囉！