自從財政司司長曾俊華唔知黐咗邊條筋，竟然話自己係中產之後，中產階級呢一個概念好快榮登城中熱話流行榜，大家議論紛紛研究何謂中產。你一言，我一語，七嘴八舌通常唔會有乜嘢共識，唯一嘅共識係鬍鬚曾九唔搭八，一個年薪幾百萬嘅政府高官冇可能係中產，如果曾司長紆尊降貴真係淪落為中產，全港七百萬小市民大部分可以歸類為窮光蛋。
為咗了解小市民心目中何謂中產，有機構做咗一項民意調查，結果都相當有趣o架。調查發現，百分之五十六受訪者認為，最低限度應該擁有價值二百萬至八百萬元物業先至能夠稱得上係中產，扣除物業價值之後，最少應該擁有五十萬至六十萬元資產，先至可以躋身中產行列。另外，百分之四十五受訪者覺得，中產階級每月總收入應該有三萬至六萬元。調查又顯示，百分之七十受訪者認為，有文化修養同關心社會時事都係中產嘅重要界定，百分之三十受訪者覺得自己係中產。
中產中產，其實好鬼死慘。中產到底係乜東東呢？簡單咁講，比上不足，比下有餘，發達唔使望，餓又餓唔死，稅就交到足，福利乜都冇。中產最悽慘嘅係窮其半生精力為一層樓做奴隸，樓奴呢一個稱呼道盡當中嘅辛酸。其實，對於樓奴嚟講，每月收入三萬至六萬元，扣除供樓之後，生活唔好得攞綜援幾多嘅咋，你話喇，咁算唔算中產吖？
呢，保安局數字顯示，今年上半年有三千九百名香港人移居外地，較去年同期上升超過百分之八，主要移民目的地係美國、澳洲以及加拿大等等，令人擔心再有另一波移民潮。因乜事幹雞咁腳要走呢？樓價高企係主要原因，中產人士頂唔順咯喎，咪惟有遠走他鄉囉。
今年一月美國一間機構發表全球住屋負擔報告，香港喺三百三十七個大城市之中連續三年位居榜首，即係最難置業嘅城市，樓價係家庭年收入嘅十三點五倍，遠遠高於第二位嘅溫哥華，人哋樓價係家庭年收入嘅九點五倍咋。唔少精打細算嘅香港人會諗，與其蝸居一個豆腐膶單位，不如用同樣價錢去外國買一間獨立屋好好享受。喂，若然中產階級每月總收入係三萬至六萬元，喺香港就話由於供樓而變得捉襟見肘啫，移民外地隨時升格上等人喎，何樂而不為！
其實歸根究柢講來講去，一日最衰就係特區政府嘅房屋政策太失敗，搞到小市民無法安居樂業。好心財爺曾俊華唔好再扮中產嘞，如果唔想中產階級人人喊咁口遠走高飛，將房屋政策撥亂反正啦！