八月十五是中秋，然後又到黃金周，十一假期例必再有大量內地同胞排山倒海而來，零售業界或者會笑逐顏開，之不過中港矛盾有可能加劇。本地人同內地客其中一個摩擦點係奶粉問題，到底從今年三月開始實施嘅限奶令會唔會短時間之內取消呢？
雖然內地傳媒好似山草藥咁樣噏得就噏，聲稱「香港黃金周後或取消限奶令」、「香港或取消限奶令」甚至以充滿價值判斷嘅標題「知錯能改，善莫大焉」吸引眼球，不過完全與事實不符。
根據食物及衞生局局長高永文嘅講法，檢討本港奶粉供應鏈嘅委員會已經委聘顧問公司，喺十一黃金周前後進行壓力測試，如果證實測試期間嘅措施可以確保本地嬰兒嘅奶粉供應，不排除撤銷限奶令。不過佢強調，撤銷限奶令與否視乎測試結果，目前言之尚早。
對於內地同胞尤其係水貨客而言，限奶令當然愈快撤銷愈好啦，至於奶粉供應商咯喎，同樣爭取盡快踢走限奶令。為咗達到呢一個目的，香港奶粉業界合作拋出「供應充足約章」，仲提出設立「訂貨安全網」，承諾任何時間都保持奶粉貨源充足。奶粉供貨商承諾每月儲備一百一十萬罐奶粉供香港嬰幼兒使用，並且加強補貨效率，縮短補貨時間。
而藥房就話喎，奶粉供應商會透過「媽咪會」畀本地媽媽訂購每月至少六罐奶粉，藥房會備存每個牌子不同階段奶粉至少各十二罐。
計功夫茶話齋，長遠而言限奶令確實係應該撤銷嘅，畢竟香港係一個以自由貿易聞名於世嘅國際大都會，冇理由有生意唔做，有錢唔賺，左限右限阻手阻腳啫。無可奈何嘅係，國產奶粉真係靠唔住吖嘛，搞到內地同胞非要崇洋不可，係都要喺香港搶購品質有保證嘅外國奶粉，特區政府唔落閘放狗限購奶粉嘅話，「巧婦難為無奶催」嘅本地媽媽隨時斷糧，小寶寶一個二個「無乳問蒼天」。所以咯喎，歸根究柢係偉大祖國必須出盡九牛二虎之力，徹底杜絕無良奸商繼續炮製毒奶粉。
喂，其實唔止香港推出限奶令o架，好多外國社會同樣受到中國人搶購奶粉嘅困擾，不約而同為奶粉購買數量設立上限，鬼叫中國人口咁多咩，而且出國消費成風，掃貨能力簡直係驚天地泣鬼神。換言之，製售毒奶粉嘅無良奸商禍及全球，只有將呢一種人渣敗類消滅殆盡，全人類嘅下一代先至能夠安心飲奶。
不如咁講啦，毒奶粉徹底剿滅，限奶令自然消失。