在家靠父母，出外靠朋友。朋友呢家嘢真係好處多籮籮，有時互相包庇，有時互相提攜，假如有利益必須輸送嘅時候，朋友自然係第一個受惠對象。所以咯喎，有貪曾之稱嘅前特首曾蔭權爵士有好多朋友，有貪湯之稱嘅前廉政專員湯顯明亦有好多朋友，貪曾同貪湯之間更加係非比尋常嘅老友鬼鬼。
當然啦，老友鬼鬼利益輸送係會觸犯防賄條例o架 ，所以貪曾同貪湯都淪為廉署嘅調查對象。有乜嘢辦法杜絕出外靠朋友造成嘅貪腐歪風呢？譬如話，政府職位出現空缺，點樣先至能夠防止朋友之間私相授受呢？本地官場行之有效嘅辦法係公開招聘，開誠布公，選賢與能，能者居之，廢者躝開。問題係特區政府愈來愈不知所謂，一個二個冇經過公開招聘就用人惟親，最新事例發生於衞生署，受益人係衞生署口腔頜面外科前主任李烱康。
六十二歲嘅李烱康一○年九月退休，除咗喺金鐘私人牙科診所掛單之外，退休後兩個月獲聘為威爾斯親王醫院口腔頜面外科兼職高級臨床醫生，逢星期三同星期四應診。知情人士透露，衞生署設立呢一個職位嘅原意係縮短病人輪候時間，不過喺冇公開招聘嘅情況之下僱用李烱康，每月平均診症只有八天十六節，治療病人數目少，實際功效成疑。咁都唔止喎，李烱康名義上係兼職員工，實際上有特權可以使用顧問醫生嘅辦公室以及專用泊車位，超出兼職員工應得嘅福利。
正如有立法會議員話齋，衞生署聘請專才理應公開招聘，即使有關職位要求特殊知識亦須公開招聘，咁先至符合公平公正原則，避免造成益自己友嘅觀感。很明顯，衞生署根本冇經過公開招聘程序。
到底係邊個決定容許衞生署翻閹一個退休牙醫嘅呢？咪就係當時嘅衞生署署長林秉恩囉，如果唔係署長恩准，益自己友係唔會成事o架。正如佢曾經豪批一年有薪假畀女下屬考大狀咁，簡直離晒大譜。
講真吖，廉潔奉公作為香港嘅核心價值，日漸衰頹嘅主要原因就係朝中有人好做官嘅歪風作祟。冇耐前之嘛，消防處招聘十六個職位又係黑箱作業，招聘告示僅僅刊於消防處網站，冇經過公開招聘嘅程序，明顯係翻閹退休消防員，益自己友嘅做法簡直係私相授受。
所以計功夫茶話齋，公務員事務局不但要跟進衞生署，更加要好好監督其他政府部門包括消防處，唔容許官場扶搖靠朋友。喂，用人惟親係廉政墮落嘅象徵，大家都唔想見到官場出現一隻二隻不知羞恥為何物嘅貪腐妖獸啩！