熟悉功夫茶嘅忠實讀者大概都知道，功夫茶最鍾意祝福大家身體健康，千祈唔好病。今日適逢中秋佳節人月兩團圓，又係時候祝福大家身體健康，飲食要小心，出入要謹慎，煲蠟呢家嘢當然唔好玩啦，隨時玩出禍o架。
身體健康之所以咁重要，首先關乎男女老幼嘅生命安全，其次就牽涉到香港一個怪現象，病人往往得唔到應有嘅待遇。譬如話，一個唔好彩病到五顏六色，送到醫院隨時會遇上匪夷所思嘅非一般服務，有時輸錯血，有時打錯針，有時開錯藥，有時甚至左右不分割錯女病人嘅乳房，害到人哋「無乳問蒼天」。
就算唔係錯呢樣錯嗰樣嘅醫療失誤，公立醫院都有一個耐人尋味嘅特殊風格，就係你急佢唔急，處理病人嘅速度慢吞吞，所謂嘅急症室絕對可以改名叫做慢症室，駐院醫生一個二個都係慢郎中。
就以沙田威爾斯親王醫院為例吖，前晚有大量病人滯留急症室，滯留時間短則半日，長則一天，輪候嘅情況係日以繼夜再夜以繼日。有一位跌傷腳嘅伯伯喎，開始輪候嘅時間係中午十二時左右，天光等到天黑，天黑等到天光，一直要去到翌日早上九點先至得到安排入院留醫，足足等咗二十一粒鐘，差不多就係一日時間。
另一位撼傷後腦嘅六歲小朋友，由夜晚七點等到第二朝六點先至有人幫佢照X光同縫針，搞到十點先至走得。小朋友受傷已經難頂啦，醫護人員仲要逼佢通宵捱眼瞓癡癡地等，你話係咪不人道吖？功夫茶唔反對你話佢虐待兒童囉。所以咯喎，滯留急症室嘅人群有理由懷疑，醫院當時根本處於真空狀態。
其實呢，香港公營醫療系統人手不足早已係公開秘密，威院害人等呀等，原因不外乎醫生短缺，七個蓋冚唔到十個樽。好衰唔衰醫管局又係一個出名管理混亂嘅機構，調配人手永遠做唔到急民之所急。好似即將於九月二十四日開張大吉嘅北大嶼山醫院咁吖，為咗應付啟用初期每日八小時嘅急症室運作，院方必須跨區挖角，先至羅致到十四個醫生駐診。喂，急症室一日只係運作八小時，另外十六小時點算呢？病人冇能力控制自己幾時仆崩鼻或者跌穿頭o架，睇急症竟然摸門釘好徬徨啫！
除咗北大嶼山醫院之外，未來將會有幾間新醫院落成開張，醫管局如果繼續唔做好人手規劃，滯留急症室嘅情況好大可能變本加厲。大家唔好忘記，急症室醫生流失率愈來愈高，最新比率係百分之五點五。
即係咁，最需要急救嘅其實係醫管局本身，未曾藥到病除之時，小市民千祈唔好病，中秋節快樂！