牛丸竟然冇牛，米粉竟然冇米，中國人炮製嘅假劣食品五花八門，多到令人眼花繚亂。勢估唔到嘅係，身為正貨之都嘅香港，亦有一間老字號涉嫌欺世盜名，以鮮製龜苓膏馳名於世嘅連鎖店海天堂，被指出售發霉嘅龜苓膏，而且龜苓膏未必有龜板成分！
踢爆事件嘅係一位自稱係海天堂前總經理嘅蔡國強，佢喺網絡上載兩段短片，其中一段顯示，有人徒手將膠杯龜苓膏上面嘅包裝膜揭開，然後倒入寫有「海天堂」字樣嘅瓦盅之內，冒充原盅龜苓膏出售。另一段短片就顯示，有人將一盅盅已經發霉嘅海天堂龜苓膏，放於水龍頭之下用清水沖洗，然後以海綿抹去表面嘅白色霉菌，再蓋好放入雪櫃冷藏。
蔡國強聲稱，兩段短片都係攝於海天堂廣東一間分店，係佢喺海天堂任職期間去各分店巡視業務嘅時候偷拍。據講，以膠杯盛載嘅龜苓膏每杯成本價只係幾元人民幣，海天堂將膠杯龜苓膏由惠州廠房運去各大分店，然後吩咐店員喺開舖前或收舖後，將膠杯龜苓膏移花接木倒入瓦盅，冒充貴價新鮮原盅龜苓膏出售。膠杯龜苓膏喺內地售價係二十元一杯，瓦盅龜苓膏每盅三十元，貴五成咁多o架。
海天堂創辦人兼董事長吳耀明當然矢口否認啦，話有人設局陷害喎，已向惠州警方報案。真相到底係點呢？即使撇除陷害成分，城市大學生化系張漢揚教授今年八月做過化驗，海天堂四個樣本之中有三個完全冇龜板成分，另外一個樣本嘅龜板含量係極微，咁又點解釋？
呢嗱嗱嗱，講到呢度大家係咪覺得好搵笨？人哋食龜苓膏都係想清熱解毒啫，家陣食咗隨時有事，而且有可能因此而激到心火盛，條數點計呀！
食物及衞生局局長高永文話喎，對於今次事件非常關注，食物安全中心有需要嘅時候會喺市面抽樣化驗。高局長又話，食安中心喺恒常嘅食物檢驗之中，並未驗出龜苓膏樣本有問題。
計功夫茶話齋，如果當局驗唔出龜苓膏有問題，呢件事本身就係大問題。喂，人哋城大教授都驗出海天堂龜苓膏冇龜板成分啦，一眾官僚係咪食懵咗呀？定係一個二個做咗縮頭烏龜，有問題都話冇問題？新修訂嘅《商品說明條例》規定，製售與事實不符嘅產品係犯法o架，食安中心驗唔出有問題，點樣嚴明執法呀，龜縮官老爺！
點都好啦，唔該高永文狠狠下令食安中心，唔准偷懶，不能鬆懈，所有以公帑出糧嘅大官小吏發揮正宗龜苓膏嘅功效，為消費者清熱解毒！