醫療事故一單也嫌多，偏偏香港醫療事故無日無之，害到無數病人無辜枉死，唔少人甚至命喪於同一類醫療失誤之下。古人話，一之為甚，豈可再乎。公立醫院不斷重複同樣錯誤，製造同樣悲劇，究竟係救人定殺人？
呢嗱，又有病人離奇死亡嘞。一名八十八歲癌症男病人由東華醫院轉送瑪麗醫院接受電療，出發前半小時已經抽痰確保氣道暢通，點知由救護車送抵瑪麗時面色灰黑，失去知覺，到急救時先至發現原來係造口氣道塞住兩舊紙巾，最後終告不治，成為醫療失誤之下另一個冤魂。
你話係咪得人驚吖？公院醫療事故層出不窮，五花八門，已經唔係新聞，諗唔到連導致病人窒息死亡咁恐怖嘅事情都會一而再、再而三發生，唔到你唔服。兩年前之嘛，一名七十三歲喉癌老翁喺九龍醫院療養期間死亡，事後證實因氣管造口被紗布封死而氣絕身亡。
今時今日，入醫院好似入地獄，淨係導致病人窒息死亡嘅方式就無奇不有，上次係紗布，今次係紙巾，下次會唔會係報紙吖嗱？
當局對今次事故又點解畫呢？食衞局局長高永文話喎，氣管造口要非常小心處理，醫院暫時搵唔到死者異物塞喉原因；又話事件已經轉交警方及死因庭調查，現時無足夠資料作出判斷同揣測咁話。
唉，講咗等於冇講，簡直廢話。次次醫療事故害死人，當局唔係交由警方及死因庭研究，就係成立小組調查，可惜次次結果都係一樣，求其打幾句官腔，搵幾個前線人員做替死鬼就算數，而管理層就永遠都唔使負責，你話喇，咁嘅調查究竟有乜意義吖？唔怪得同類事故不斷重複喇。各位港產官僚，人命關天呀，點可以咁兒戲，唔該認認真真尋找病源，對症下藥啦！
嗱，官老爺話無足夠資料判斷事件，但係功夫茶就有足夠證據證明公院醫療亂象係由庸官造成。其他唔講，就講前線醫護人手不足嘅問題吖，呢個陳年頑疾醫番好未？如果病情未見好轉，係因為已經病入膏肓無得救，定係黃綠醫師太水皮呀？講真，前線人員飽受壓力，搞到士無鬥志，不斷逃亡，由十個煲七個蓋變成十個煲五個蓋，做到有氣無碇抖，唔出事至奇啦！
公立醫院又殺人，管理混亂是死因。好多人以為，人稱「每周一鑊」嘅周一嶽離開食衞局之後，醫療亂象有機會得到改善啦，點知結果又係咁。事實證明，醫管局千瘡百孔，港府聲稱要全面檢討，仲煞有介事成立督導委員會，希望今次唔好又虎頭蛇尾嘞，當局需要關注嘅唔止係醫院嘅亂象，仲有醫療庸官阻住地球轉嘅痼疾吖。一句講晒，醫局架構不整頓，醫療事故無了期。