考考大家，知唔知大嶼山以前嘅舊名係乜？畀少少貼士啦，不妨從大嶼山嘅英文Lantau Island諗一諗。聰明嘅讀者大概已經諗到，大嶼山以前叫做爛頭島，由於呢個名大吉利是唔係咁好聽，所以棄用好耐咯。
再考考大家，知唔知中環蘭桂坊以前嘅舊名係乜？聰明嘅讀者舉一反三或者又已經諗到，冇錯嘞，蘭桂坊以前叫做爛鬼坊，原因係當地洋人爛鬼特別多，環境污糟邋遢，品流非常複雜。衞道之士當然覺得爛鬼坊嘅叫法不雅到極啦，所以一嘢改名做蘭桂坊，寓意蘭桂騰芳，聽起來不知幾咁馨香。
之但係非常可惜，好聽嘅名稱唔一定代表優良嘅品質，唔通你阿媽叫你做黃金富，你就真係黃金滿屋富甲天下咩？爛鬼坊雖然改名叫做蘭桂坊，實際上爛鬼依然特別多，多到轉個彎就撞鬼。
即係咁，蘭桂坊作為一個尋歡作樂嘅蒲點，家陣烏煙瘴氣，恍如人間妖域。蘭桂坊之爛，爛在沉淪毒海，販毒活動十分猖獗。除咗本地爛鬼之外，近年更加有非洲幫、南亞黨、半唐番以及鬼妹仔等等黑勢力插旗搵食，形成「五鬼出洞」嘅邪氣格局。五鬼之中特別以非洲裔毒販發展得最迅猛，搞到老蘭亂七八糟。
根據知情人士透露，老蘭嘅毒販多數採用化整為零嘅方式出貨，每次只會隨身攜帶少量毒品兜客，如果一不小心被警方查獲，就會話毒品係自用而唔係銷售，一方面可減少損失，另一方面係避免受到太重刑罰。至於積極進取嘅非洲裔毒販咯喎，佢哋吼準警方較少截查外國人嘅漏洞，招攬一批西洋魔女協助散貨，兜售毒品嘅對象不分種族膚色，簡直係華洋共融一網打盡。
自甘墮落吸食毒品就話咎由自取啫，萬一無知少女遇人不淑誤吞迷姦水又點呢？爛鬼坊除咗毒品熱賣之外，俗稱「炸女」之用嘅迷姦水亦交投活躍，每樽一百毫升迷姦水售價五百元，只要將一個樽蓋嘅分量加入飲品，就可以令到淑女變淫娃，清醒之後乜都唔記得晒。
講到呢度，功夫茶向特區政府強烈建議，若然警方愛理不理懶懶閒，硬係唔想從嚴執法撲滅罪行，任由五鬼出洞繼續毒害香港，不如將蘭桂坊恢復舊名，叫番做爛鬼坊算嘞。喂，蘭桂坊好好歹歹都係一個國際知名嘅蒲點，若然有外國遊客傻更更一失足成千古恨，居然淪為迷姦水嘅受害者，你話點算好呢？港譽蒙羞會導致經濟損失o架！
計功夫茶話齋，執法者一偷懶，蘭桂坊即變爛。既然香港警察最近是非多多，受歡迎程度大不如前，不如以掃蕩老蘭毒販作為立功表現啦！