唔知係咪流年不利，廉政公署最近是非多多，呢頭畀人批評政治化，嗰頭又畀人炮轟查案不力辦事拖拉，認真濕滯。
點樣查案不力？咪又係曾蔭權爵士好帶挈囉。話說廉署立案調查曾爵士嘅貪腐醜聞唔經唔覺已十八個月，點知查嚟查去得個吉，到依家仲係無聲無息，無影無蹤，令人莫名其妙。呢，律政司前任刑事檢控專員江樂士又忍唔住喇，佢繼早前致函東方報業集團質疑廉署拖延調查及檢控之後，尋日再次來信要求當局盡快交代。
江樂士係咁講嘅，貪曾案去年二月已經轉交廉署跟進，指控佢與多名富豪勾勾搭搭，涉及利益輸送，至今律政司仍未交代貪曾會否被檢控。反觀多宗涉及其他高官權貴嘅案件，包括前政務司司長唐英年僭建案、前行會成員林奮強涉偷步賣樓案、另一名前行會成員張震遠捲入商交所案，當局都可以喺三個月至十二個月內完成調查，並決定是否作出檢控；就算當年調查財政司司長梁錦松涉偷步買車事件，亦唔使一年時間。
冇錯嘞，貪曾「貪遍省港澳、歎盡海陸空」，證據確鑿，點解要用咁多時間調查，的確令人費解。最唔合理嘅係，廉署舊年四月以協助調查貪曾案為由，延長前執行處處長李銘澤任期，依家李銘澤已約滿離任一年有多，而負責處理此案嘅律政司現任刑事檢控專員薛偉成亦將於九月八日退休，但成單案件仲係零交代，如果話當中冇蠱惑，細路仔都唔信喇。
當局又點解釋呢？薛偉成反指江樂士唔清楚案件詳情及進度，佢話案件已接近完成，由於涉及境外調查，所以需要多啲時間處理，即係話，調查層面可能涵蓋澳門及深圳等地方。嗱，講就係咁講喇，事實係咪係咁，大家不妨拭目以待。
成件事最諷刺嘅係，江樂士接連炮轟當局查案不力，損害法治，雖然義正詞嚴，但查實佢當年做官嘅時候亦係咁嘅咋。正所謂，來說是非者，便是是非人，好多高官在位嘅時候扮鵪鶉，對官場亂象唔係視若無睹，就係噤若寒蟬，一旦退休咯喎，即時扮晒老師傅及老前輩，對官場指指點點，說三道四，以民主女神自居嘅陳方安生係咁，李銘澤及江樂士亦係咁。內地經常畀人批評老人干政，其實香港亦唔好得去邊，呢啲咪就係天下烏鴉一般黑囉。
即係咁，香港有言論自由，人人都有發表意見嘅權利，退休高官當然亦唔例外，問題係，唔少退休高官其身不正，但就偏偏鍾意扮正義，係又噏，唔係又噏，都唔知究竟有乜居心。唔怪得有人話香港妖孽為患，神鬼不分，真係一啲都冇講錯。
無論點都好，拖得過初一，拖唔過十五，貪曾案遲早要了結，再拖落去都唔係辦法o架！