免費報紙派通街，通常有乜嘢下場呢？下場往往好似安全性產品咁樣即用即棄，讀者搭完一程車就會隨手丟入垃圾桶，好彩嘅有得回收，不幸嘅攞去堆填。命運更加坎坷嘅免費報紙連即用即棄嘅機會都冇，根本未用即棄，直接淪為垃圾。
呢嗱嗱嗱，尋日就發生咗兩件關於免費報紙嘅事，性質非常之咁接近。第一件事發生於黃大仙，有一個運報工人喎，懶得將原本打算派通街嘅免費報紙《都市日報》送去指定地點，半路中途將一千九百份報紙交去竹園南邨變賣。未用即棄嘅報紙等於廢紙，變賣廢紙嘅利潤係一百六十元。呢一個運報工人行藏敗露，警方接報到場將佢拘捕，罪名係監守自盜。
第二件事嘅情況差不多，未用即棄嘅報壇孤兒仔係《am730》，案發地點係西環，當作廢紙變賣嘅數量係一千份。賣到幾多錢呢？唔知喎，聽講監守自盜嘅運報工人未收錢已經東窗事發。
既然《都市日報》同《am730》都有咁嘅坎坷命途，功夫茶不期然想起壹淫媒旗下嘅《爽報》，呢一份「爽死了」嘅免費報紙有幾多係直接淪為垃圾嘅呢？若然一個唔覺意冇人回收，多不勝數嘅《爽報》攞去堆填區處理，對於環保嘅損害真係好大㗎。你知啦，香港嘅堆填區正在陷入飽和嘅危機，壹淫媒打腫臉充胖子，起勢咁印又起勢咁丟，丟呀丟，丟呀丟，大量被丟棄嘅《爽報》就係環保破壞王，遺禍子子孫孫。
講到呢度，又係時候同大家研究一下好報同壞報嘅分別。好報者，《好報》也，呢一份報紙就唔同嘞，由於係信譽優良嘅東方報業集團出版，所以《好報》有嚴謹嘅監察之餘，更加因為品質一流導致領取者大排長龍，人人讚好，個個歡天喜地攞返屋企。
首先咯喎，《好報》隨《太陽報》逢星期五附送，讀者既然畀錢買一份《太陽報》而得到一份慷慨送贈嘅報紙，又點會輕易放棄呢？其次咯喎，東方報業集團委託專人於指定地點派發《好報》，杜絕監守自盜，防止未用即棄。
大家都聽過成語良莠不齊啦，良者，好也，《好報》名副其實好好好。莠者，壞也，當你見到嗰啲免費報紙出師未捷身先死，未到讀者手上已經墮落為垃圾報，你就知呢一個莠字係點解。
打個譬喻吖，同樣係用以餵飽小寶寶嘅奶粉，國貨可能有毒，洋貨甚少劣質，精明嘅消費者包括國內同胞都識得點樣揀啦。所以咯喎，各位精明嘅讀者請記住，《好報》不但內容精彩好好睇，而且遠遠優勝於其他免費報！