派錢終於有安排　並不代表錢冇嘥

人人有銀用，個個六千元，派錢嘅辦法到底係點嘅呢？八月二十八日起按年齡長幼分五批開始接受登記，明年三月三十一日滿十八歲持有永久性居民身份證都符合資格攞錢，政府將於十一月向已登記市民陸續派錢。如果你食飽無憂米，根本唔等錢開飯，選擇明年四月至十二月先至登記，你會額外得到政府醒你二百元。如何登記嘅詳情，功夫茶就唔同大家囉囌嘞，請揭去本報新聞版面了解了解。

因乜事幹遲登記有得醒？根據「三曾政府」嘅官方邏輯，指導思想有咁嘅理論，派錢有機會刺激通脹，假如有錢在手嘅市民一窩蜂走去消費，話唔定會將通脹率推高幾個巴仙。如果有人選擇遲啲登記，咁咪會遲啲消費囉，樂觀估計通脹唔會刺激得咁交關。

當然啦，官方邏輯好多時候同狗屁邏輯冇乜太大分別。功夫茶問問大家，如果你真係食飽無憂米，根本唔等錢開飯，你出街消費有必要擇日咩？有六千銀又好，冇六千銀都好，你隨時隨地都會買衫買鞋甚至買樓㗎啦。假設你係億萬富豪吖，功夫茶打死都唔信你會遲至明年四月至十二月登記咗之後先至吃喝玩樂。

冇錯，派錢終於有安排誠屬好事，貧苦大眾起碼唔使望穿秋水餓到肚皮打鼓，同時又證明急就章拍拍腦袋決定派錢嘅曾俊華都唔蠢得晒，不必等到夕陽政府夠鐘收工之後先至有錢落袋。之但係咁，派錢有安排並不代表錢冇嘥，因為最關鍵核心嘅問題仍然存在。

呢嗱嗱嗱，不如睇睇盛裝出場嘅紫荊俠點解要頻頻出動扶貧濟世。呢一位事業線驕人嘅女俠話呀：「既然政府亂派錢，不如等我修正，我將擇日出動，先派我的六千元！」正正因為政府亂派錢，窮人又派，中產又派，富翁又派，連移居海外嘅「外國人」都派，咁先至激發紫荊俠雄心壯志撥亂反正。

即係咁，政府家陣打算撥款三百七十九億八千萬元派錢，試問有幾多億係浪費彈藥嘅呢？如果將原本派畀富翁嘅錢改為派畀窮人，咁先至係用得其所吖嘛。

唉，好似紫荊俠咁充滿熱血嘅英雄好漢始終罕見，反而為富不仁嘅無良奸商就通街都係，你期望有錢一族學似紫荊俠咁樣將自己嘅六千銀捐出去扶貧？唔係話一定冇可能，機會率低過前晚烏雲密布有幸見到天文奇景月全食咁解囉。

總而言之一句講晒，派錢無法買得到人心，七一難免繼續倒三曾！