又捏造竊聽風雲 爛果報無恥搵笨

吓?唔係啩?內地公安竊聽所有中港牌車輛?呢鋪大大大大劑咯,簡直係白色恐怖,乜鬼政商猛人呀,乜鬼名人明星呀,隨時洩露極密私隱都懵然不知啦!

件事係咁嘅,《蘋果日報》玩踢爆,日前頭版雞乸咁大隻字報道「公安加裝偷聽器/中港車全竊聽」,形容為真實版《竊聽風雲》。內容係話,所有中港牌車輛都被內地公安加裝具備竊聽功能嘅「檢驗檢疫車載卡」,車載卡外形大小與電子手帳相若,以雙面膠紙貼於車內擋風玻璃,儀器背部螺絲位蓋上保護貼防止私下拆開。

嗱嗱嗱,咪住先,淫賤黎旗下爛果報出晒名係山草藥噏得就噏,杜撰故事實屬家常便飯,而且唔止小便飯,經常仲有大便飯,公安竊聽中港牌車輛咁嚴重嘅指控,有幾多真憑實據呀?唉,講出嚟好似玩泥沙咁兒戲,唯一嘅所謂證據原來係該報記者將一個車載卡交畀香港一位學者「目測」,然後就斷然得出一個結論:竊聽範圍達到方圓二十公里。

既然爛果報冇乜信譽可言,本報記者為求查找真相,將一個車載卡送交同一位學者檢查,呢一位學者就係城市大學電子工程學系副教授鄭利明。本報記者當然唔係要求「目測」咁神化,而係徹徹底底進行解剖式檢測。鄭利明經過認真研究之後斬釘截鐵表示,車載卡不能竊聽。鄭教授仲好無奈咁話,當日已經向爛果報記者強調一切只係可能。

一個學者話不能竊聽啫,為求穩陣起見,本報記者再將另一個車載卡交畀另一個專家檢測。香港專業教育學院(屯門)資訊及通訊科技系系主任梁秉雄檢測完之後得出一個相同嘅結論,車載卡不能竊聽。

既然專家之言顯示爛果報嘅所謂報道純屬子虛烏有,車載卡生產商又點講呢?生產商深圳鼎識科技公司總裁丁曉雲怒轟對方不負責任,令人感到憤慨,考慮向爛果報採取法律行動。至於無端端嚇餐飽嘅中港司機就話嘞,《蘋果日報》無中生有到無恥地步!

計功夫茶話齋,無恥呢家嘢絕對係淫賤黎同壹淫媒嘅強項,記唔記得爛果報無中生有捏造「陳健康事件」呀?呢一個傳媒敗類居然自編自導畀埋錢叫剛剛喪妻不久嘅陳健康北上嫖妓,無恥嘅程度堪稱地上最強。

其實,爛果報咁鍾意老作,使鬼請咁多記者咩,搵幾個編劇閂埋門日作夜作,當寫劇本咪得囉。最冤枉嘅係讀者,每日花六元買張爛果報,但一年三百六十五日之中,唔知幾多日唔係睇新聞,而係睇「作聞」,老作嘅新聞。

Money18免費即秒股票報價網站現推出8升級功能,財經資訊,實時實發!