石屎森林，死氣沉沉，加上香港空氣污染嚴重，行街街嘅感覺唔係咁盞鬼㗎咋，隨時要掩住個鼻急急腳咁行。如果大街小巷可以種植花草樹木調劑一下，順便利用植物嘅光合作用消除廢氣，你話係幾咁身心舒暢！
人同此心，心同此理，於是乎土木工程拓展署早於○四年開始為市區制訂及推行綠化總綱圖，路邊呀，橋底呀，大量種植各式各樣喬木與灌木。聽落係咪心曠神怡呢？單以觀塘區綠化工程為例吖，拓展署發言人話呀，○九年九月開咗工㗎喇，現已栽種四千五百棵喬木，以及一百一十萬棵灌木，預計今年年中完成。講到喬木，大家有冇留意近日鳳凰木開花？樹頂紅彤彤一大片繁花似海，壯觀到呢，好似熊熊烈火！
講完一輪風花雪月，如果你認為香港家陣變咗綠樹林蔭嘅人間天堂，功夫茶勸你都係及早返火星，事關位於地球亞熱帶嘅特區政府從來唔會交得出以民為本嘅亮麗政績。即係咁，拓展署係就係廣種植物，不過種完即刻拍拍屁股走人，該署官僚冇做好保養工作，不少綠化工程虎頭蛇尾。喺咁嘅環境底下，一係植物變得殘花敗葉，一係花槽垃圾堆積如山。
好似油塘鯉魚門邨對出迴旋處咁吖，栽種植物初頭有一段日子真係綠油油㗎，駕駛人士離遠見到已經醒神。不過可惜吖，綠油油嘅景象恰似曇花一現，由於缺乏打理咯喎，同一地點家陣已經髒亂不堪，街坊形容為成個垃圾崗！
前人種樹、後人乘涼嘅先決條件係乜呢？當然係前人種樹有必要持之以恒長時間保養，否則棵樹種得幾種枯鬼咗，後人係冇可能乘涼嘅。整鬼佢吖，拓展署冇錯係扮演前人角色廣種樹木，但係竟然冇持之以恒長時間保養，大腳傳中一嘢將個波踢畀食環署，卒之搞到一鑊粥。
大家行街街之時不妨留意一下，路邊花槽經常出現紙巾呀、煙頭呀以及空樽等等棄置雜物，一來固然反映香港人缺乏公德心，二來咯喎，反映綠化計劃有頭威冇尾陣，官僚作風始終得過且過。
觀塘區議員柯創盛講得啱呀，綠化工程只着重前期種植工作，漠視後期護養，失卻綠化原意。計功夫茶話齋，綠化無疑係好事，不過一定唔可以任由官僚好心做壞事，否則綠化隨時變醜化。唔好唔記得香港近年接連出現冧樹殺人事件，歸根究柢咪又係官老爺護養不力囉。官不殺路人，路人因官而死，醜上加醜！