雖然話源源不絕嘅內地孕婦來港產子潮搞到香港醫院不勝負荷，實在有必要採取一定措施限制人數，之但係咁，當中有兩個問題值得商榷。第一個問題係，港人內地孕婦應唔應該列入限制範圍？第二個問題係，假如係高危孕婦，應唔應該拒人於千里之外？
家陣有一單案例係咁嘅，有一個香港人司徒先生，娶得內地嬌妻之後太太懷孕已經三個月嘞，喺香港撲來撲去都撲唔到婦產科床位。公立醫院就話人滿之患冇位啫，私家醫院明明有位，竟然都話唔收症，理由到底係乜呢？原來係咁嘅，呢一位港人內地孕婦懷咗三胞胎，私家醫院認為「風險太高」，所以拒絕收症。
嗱嗱嗱，呢個就係功夫茶想同大家商榷一下嘅問題。先唔講港人內地孕婦應唔應該列入限制範圍吖，仁心仁術嘅醫療工作者乜唔係濟世為懷嘅咩？點解一見到高風險三胞胎即刻耍手擰頭？打個譬喻吖，有人遇到車禍斷手斷腳流血不止，救得番嘅機會率只有一成，如果醫院認為風險太高所以拒絕收症，咁呢一間醫院即係黑心到極嘅見死不救！
唉，成日都話內地同胞道德滑坡嚴重，內地醫院見錢開眼草菅人命，估唔到香港醫院都有逐漸沉淪嘅趨勢。內地醫院有時候真係好鬼死缺德㗎，加上官僚作風漠視民間疾苦，隨時害到老百姓家散人亡。好似河南濟源市一個年約五十歲嘅農民趙堯武咁吖，早前不幸遇上車禍，點知醫院話冇錢冇得做手術。窮到燶嘅趙家四圍撲水啦，先後求助鎮長、市長、衞生部門、民政局等等多個單位，竟然全部不得要領，冇一個官老爺願意伸出援手。可憐身受重傷嘅趙堯武撐足十一日終於撐唔住，就咁與世長辭。
睇番香港嘅醫院，無驚無險嘅孕婦就收症賺錢，風險太高嘅孕婦就拒諸門外，雖然未至於百分百見錢開眼，不過點都算係本末倒置。醫者父母心吖嘛，不但唔應該趕客，反而最需要第一時間搶住救助風險太高嘅病患者先至係仁醫之道！
至於港人內地孕婦應唔應該列入限制範圍，計功夫茶話齋，好心食衞局局長周一嶽大方少少豁免啦，畢竟人數不多，每年都係講緊六千人左右之嘛，所佔比率唔到每年「八萬八」封頂上限嘅一成。
講真吖，如果周局長仲記得乜嘢係醫德，見到高風險三胞胎最有道義嘅做法係要求公立醫院額外增設床位好好照顧。曾蔭權呼籲港人最好生三個，既然有人一次過完成任務，點都應該仗義相助啦，吓話！