功夫茶唔止一次講過，好後悔當初冇申請加入公務員隊伍，事關做官非常之咁多着數，家陣真係抌心口呻笨呀！
做官有乜嘢着數呢？譬如話，可以自己批准自己加薪啦，而且加幅遠遠超過市場水平，又或者自己批准自己一星期只係返五日工。至於洗腳唔抹腳浪費公帑，更加係公務員嘅特權。本來呢，「只准州官僭建、不許百姓上樓」都係做官嘅好處之一，無奈近日刮起一股反對僭建霸權嘅僭建風暴，咁先至搞到曾蔭權、孫明揚以及潘潔等等老爺奶奶焦頭爛額咋，否則一個二個享受知法犯法嘅無比樂趣，都不知幾盞鬼！
做官嘅好處唔止咁少o架，以下落嚟等功夫茶為大家再介紹一份時薪超過最低工資十幾倍嘅筍工。有一位叫做甘永權嘅仁兄喎，十年前已經辭官歸故里o架嘞，退休前嘅官位係總行政主任，點不知居然受到翻閹優待，時薪四百大元。香港電台最近以兼職形式聘用三名退休高官，職責係協理招聘港台八十名公務員，其中一個就係甘永權。
翻閹高官任職港台本來問題都唔算太嚴重，之但係原來呢一個姓甘嘅退休高官竟然食兩家茶禮。本報記者追查發現，原來甘永權同時喺教育局語文教育及研究常務委員會辦事處擔任高級計劃統籌主任。簡單咁講，甘永權一身兼兩職，明顯係着數攞到盡，兩份工月薪加埋接近五萬元，好過不少現任公務員。
好嘞，因乜事幹一個退休高官可以一次又一次翻閹？又因乜事幹可以同時兼任兩份翻閹工作？畫公仔唔使畫出腸喇啩，當然係私相授受嘅結果，自己友梗係要明益自己友o架啦！
呢嗱嗱嗱，你話當初冇申請加入公務員隊伍係咪應該抌心口呻笨呢？未退休已經着數多多，退咗休仍然有辦法搵到超筍工增加收入，簡直令人羨慕到流口水。當然啦，羨慕還羨慕，合唔合理係另一回事。立法會公務員及資助機構員工事務委員會委員李卓人就發炮嘞，批評退休公僕一人打兩份政府兼職工係「不合理安排」，又反駁公務員事務局局長俞宗怡經常揚言公務員冇斷層，質疑「冇斷層使乜翻閹」。
不如咁講啦，上樑不正自然而然下樑歪，鬼叫特區之首曾蔭權奉行親疏有別主義咩，餐餐帶頭用人唯親，做細嘅咪有樣學樣囉。又講番僭建吖，達官貴人一個二個帶頭違規建築，平民百姓唔跟風就傻仔咯！
講得好聽係親疏有別，講得難聽係朋比為奸，政府由上而下掀歪風，難怪官場醜聞長揭長有！