今年四月，白田邨驚現不尋常沉降，事隔兩月，同一條白田邨又出現多處外牆簷篷石屎剝落，如果你係一個心智正常嘅地球人，你會唔會覺得危機重重呢？會唔會擔心土瓜灣馬頭圍道冧樓事件有機會歷史重演？所以話啫，功夫茶相當懷疑房屋署相關官僚唔係地球人，或者曾經被外星人捉咗去飛碟左搞右搞，事關佢哋泰山崩於前而色不變，懶懶閒嘅態度超出正常理解範圍。
先講講最近發生乜嘢事啦。白田邨翠田樓外牆有簷篷邊位被發現整塊剝落，接近兩呎長嘅石屎砰磅一聲跌咗落嚟，大話夾好彩咋，石屎下面啱啱有一部冷氣機，咁先至托住冇跌落街，否則唔知邊個街坊一不小心命仔都冇埋。好嘞，雖然冇即時跌落街啫，之但係半天吊都好牙煙喎，房屋署係咪有責任清理殘骸呀？目睹事發經過嘅梁太二話不說馬上通知房屋署啦，整鬼佢吖，署方居然三催四請都冇派人收拾殘局。已經過咗兩星期o架喇，半天吊嘅石屎仍然半天吊，有乜風吹草動真係唔知點算好。
石屎剝落其實唔止一塊咁大把，白田邨民左望望右望望，發覺成條邨甩皮甩骨，東一處剝落，西一處坑槽，唔少地方仲有銹蝕情況。奈何房屋署嘅態度由始至終都係愛理不理，大耍官腔話一切與樓宇安全結構無關。
本來呢，淨係石屎剝落都唔係咁得人驚嘅啫，問題係白田邨冇耐之前已經有沉降危機。嗱，咁就要重溫一下今年四月嘅本報獨家報道嘞。白田邨昌田樓較鄰廈盛田樓沉降多達兩吋，兩幢大廈外牆水平標誌呈現高低不一現象，昌田樓地下主力牆懷疑受壓導致五、六條由下伸延至上嘅裂痕，兩幢大廈經常爆屎渠以及爆水管。專業驗樓工程負責人勘測後發現，昌田樓沉降及裂紋至少有十大問題，情況比想像中嚴重。
喂喂喂，先有大廈沉降，再有石屎剝落，畀着你係白田街坊吖，你會唔會嚇到心肝仔卜卜跳？你會唔會恐懼吳楚帆主演嘅《危樓春曉》變咗一齣真人騷？冇錯嘞，驚係正常嘅，唔驚就反常。之不過可惜吖，房屋署相關官僚真係有可能唔係地球人，一個二個魂游太虛，一來唔覺得有事，二來唔派人善後。
咦，咪住先，家陣房屋署署長係邊個？好似係一個叫做栢志高嘅人形物體喎。計功夫茶話齋，不如搵人捉阿志高哥哥去驗一驗個腦，萬一發現外太空異形基因，話唔定係二十一世紀最有科學價值嘅偉大新發現！