慘慘慘！雞販走投無路示威抗議固然係慘，陰差陽錯之下好警察因此殉職更加係慘上加慘！
尋日朝早，天雨路滑，中環一條行人天橋頂出現一位原本係雞苗商販，六十二歲嘅劉玉棠。呢一位仁兄原本只係想抗議政府賠償不足，事關禽流感爆發之後食衞局局長周一嶽趕絕家禽業界人士，之但係又冇好好善後，搞到人哋開飯都成問題。本來呢，警方將干諾道中往灣仔方向一段馬路全線封閉，交通嚴重受阻已經唔係咁好o架嘞，更加慘不忍睹嘅係有一位四十九歲警署警長劉志堅在橋頂企圖處理事件，不幸失足跌落地面，送院救治仍然傷重死亡。
唉，失驚無神累到警長殉職，示威人士劉玉棠非常之咁內疚，佢兩次跪地叩頭向死者家人道歉謝罪。劉玉棠強調三年來一直尋求和平方式表達訴求，但一直未能成功，長期承受痛苦與煎熬，無計可施先至決定以咁嘅行為抗爭，佢話以後都唔會再做任何有損公眾嘅事。
講真嗰句，功夫茶唔想過分苛責劉玉棠。冇錯，走上天橋頂擾擾攘攘確係造成交通不便，你甚至可以批評佢表現激進，之但係功夫茶打死都唔信佢存心靠害一個素未謀面嘅警長。表面上係示威行為累人累物，不過大家試諗諗吖，人哋如果唔係有冤無路訴都唔會引發不必要嘅慘劇。
講到呢度，功夫茶同大家傾傾佛偈。有因自必有果，有果自必有因，因果呢家嘢好玄妙嘅，世事往往你中有我，我中有你。除咗因果關係，大家又有冇聽過蝴蝶效應？簡單咁講，中國有一隻蝴蝶拍翼，振動周邊空氣，造成氣候變化，連鎖反應之下最終可能導致地球另一邊嘅美國出現龍捲風。
即係咁，成件事嘅起因可以追溯到周一嶽。假如周局長當日處理好有關問題，假如周局長又肯同劉玉棠對話，假如雙方又達成滿意共識，警長殉職係咪可以避免？咁多年以來，劉玉棠搵過周一嶽好多次o架喇，局長大人硬係置之不理。
當然啦，功夫茶都唔想過分苛責周一嶽，之不過咁，警長殉職始終同周局長有關。你中有我，我中有你，就係咁解。計功夫茶話齋，間接害死警長，局長於心何忍？如果周一嶽都有絲毫愧疚之念，最佳補鑊辦法莫過於切切實實以民為本，唔好再令家禽業者走投無路，唔好再令市民冇啖好食。係呀，真係冇啖好食o架，唔係「縮陽塑化劑」，就係「削精阻燃劑」，食品問題十分大劑。周局長做好食品把關工作，當做告慰殉職警長在天之靈囉！