暑假未到，騙徒先行，五花八門嘅招聘陷阱紛紛湧現，令人防不勝防。橋唔怕舊，最緊要受，呢類陷阱嘅受害人絕大多數係青少年，因為求職心切，成為騙徒嘅獵物，既無奈，又無辜。
警務處處長曾偉雄話喎，留意到近排有不法分子利用互聯網詐騙求職人士，警方已成立專案小組，喺暑假期間加強打擊求職騙案。佢仲提醒有意搵工嘅青少年留意騙徒嘅慣常伎倆，對收入高、入職要求低，或要求預支保證金或培訓費用嘅職位，尤其要小心。
計功夫茶話齋，專案小組其實早就應該成立啦。如果當局有先見之明，未雨綢繆做定工夫，使乜搞到家陣咁被動，暑假臨近至諗計應付，眼白白睇住咁多後生仔女畀人呃吖。
呢，有個透過互聯網「聘請」青年人向財務機構借錢嘅詐騙集團，利用偽造嘅文件，通過受害人向財務機構貸款，已經有唔少人中招，如果唔係有受害者不堪畀人追數而報警，執法部門依家可能仲無動於衷吖。
有政黨統計顯示，半年來接獲近三十宗求職被騙個案，多數涉及青少年，而且花樣層出不窮。有同學應徵推銷員，被游說購買幾萬蚊嘅教育課程同美容療程，但付款之後「老細」去如黃鶴；亦有人應徵參加訓練課程，卻被游說向財務公司貸款，年息高至近五厘，卒之搞到債務纏身。
講真，呢啲騙術熟口熟面，每逢暑假幾乎例牌上演，市民已經聽過Ｎ次咁多。如果當局早啲做嘢，及時發現並剷除呢類網上招聘陷阱，又點會有咁多青少年受害吖。
俗語話，盜亦有道。騙徒利用青少年缺乏社會經驗、求職心切嘅弱點，專向佢哋落手，可以講係奸中之奸，唔只無良，而且無恥。最可憐係嗰啲受害青少年，本來諗住趁暑假搵份工幫補家計，結果唔只冇糧出，仲分分鐘欠落一身債。如果任由呢班連骨頭都要榨埋油、專門欺詐弱勢社群嘅騙徒繼續胡作非為，逍遙法外，簡直冇天理！
講開又講，最低工資已經實施，成本增加，僱主請暑期工嘅意欲必然下降，呢類臨時職位只會買少見少。早排有社福機構開招聘會，有求職者話，搵咗個幾月都搵唔到一份暑期工。僧多粥少，一職難求，青少年搵暑期工心切，可能會產生「唔理好醜，有工就做」嘅心態，不法之徒一定會乘虛而入，設陷阱大賺黑心錢。
咪話功夫茶唔提醒港府，亡羊補牢未算太遲，如果繼續得把口齋噏，對招聘陷阱視而不見，令愈來愈多青少年中招，當局就罪無可恕喇！