管僭建長期失職 官懶蟲火燒後欄

正所謂,一石激起千重浪,勢估唔到申訴專員黎年一發表報告狠批各大政府部門監管不力啫,隨即惹起軒然大波,家陣仲牽連到副局長頭上,簡直係火燒後欄。

黎年狠批乜嘢呢?就咁,新界村屋僭建嚴重,政府長期坐視不理,黎專員咪對準官場大懶蟲嘅八月十五發炮狂轟囉。之不過咁,新界鄉紳唔覺得官場大懶蟲有錯,反而覺得黎年玩針對,欺負新界人踩到上心口咁話。於是乎,情緒激動過八十後瞓街青年嘅鄉紳吹雞成立「保鄉衞族小組」,揚言有必要時上街「革命」,而且不惜做好準備「流血」。

當然啦,功夫茶絕對唔贊成「僭建合法化」,好好歹歹香港都叫做一個法治之區吖嘛,冇可能任得村屋居民為所欲為。問題係,政府長期失職呢家嘢先至係罪魁禍首,村屋僭建既成事實咁多年,一時之間話要勞師動眾拆你屋,新界鄉紳嘅反應又未至於難以理解。

好嘞,一場僭建風暴正在成形,就喺呢個時候,堂堂一個問責高官居然捲入漩渦。環境局副局長潘潔位於大埔沙欄嘅寓所,本報揭發天台加建咗面積估計超過二百平方呎嘅玻璃屋!

喂,立法會幾個尊貴議員被踢爆家住僭建屋已經夠離譜啦,張學明呀,陳鑑林呀,黃容根呀,梁耀忠呀,全部立法不守法。家陣整多個副局長潘潔,其身不正,帶頭違法,情節更加嚴重得多。如果話議員違法僭建該打屁股,潘潔無論如何要打八十大板!

有人話,潘潔出任環境局副局長接近三年,其中一大弊病係政治敏感度太低。計功夫茶話齋,政治敏感度太低嘅絕對唔止潘潔一個,睇番整體村屋僭建問題吖,長年累月冇積極解決,終於造成尾大不掉嘅殘局,呢啲咪就係政治遲鈍囉。

家醜外傳之後,潘潔就話知衰滾水淥腳搵人搭棚拆卸僭建玻璃屋啫,你估新界鄉紳有冇咁順攤吖?即使發展局局長林鄭月娥下定決心、不怕犧牲,真係下令清拆所有僭建物,數以萬計嘅村屋拆到何年何月呢?仲有喎,新界鄉紳唔係全無道理㗎,佢哋話:「新界村屋僭建佔全港僭建數字一成咋,你要拆就全部一齊拆,唔好淨係搞新界人!」換言之,市區僭建物都要清拆,否則就係唔公平。咁就頭痕咯,拆到林鄭月娥夠鐘退休都未知拆唔拆得晒。

呢個故事教訓官場大懶蟲,長期疏於監管係唔得o架,逃避問題只會導致更大問題,一旦火燒後欄,想救都救唔番!

Money18免費即秒股票報價網站現推出8升級功能,財經資訊,實時實發!