真係咁邪？嗰頭僭建風暴刮到飛沙走石，呢頭屯門就冧簷篷，唔通連個天都睇唔過眼，要警告班懶散官僚，樓宇安全問題唔拖得，隨時死人㗎！
講起真係得人驚，五十米長、重逾百噸嘅石屎簷篷，嘭一聲成幅塌下，天降橫禍，嚇到途人魂飛魄散，驚慌逃生，有位工人唔好彩走避不及被活埋，情況危殆。廿一年前土瓜灣唯一大廈簷篷倒塌導致六死七傷慘劇，幾乎歷史重演，令人抹一額冷汗。有結構工程師指出，出事簷篷屬懸臂式簷篷，香港相當普遍，若然保養不佳，分分鐘變「都市炸彈」，殺人慘劇隨時發生。
唉，以國際金融中心自居嘅香港，居然遍地都市炸彈，真係失禮死人。冇法子喇，港府懶懶閒，提升樓宇安全明顯跟唔上時代步伐，搞到市民一步一驚心，唔通以後行騎樓底真係要戴頭盔？今次可以講係不幸中之大幸，未有造成嚴重人命傷亡，但下次仲會唔會咁好彩呢？
百噸簷篷轟然倒塌，屋宇署如夢初醒，話對事件極為關注，決定對全港四千幢建有懸臂式簷篷樓宇進行特別巡查，六星期完成喎。其實，今次塌簷篷，正正係屋宇署失職引起，原來該署十幾年前已對肇事工廈兩度發出修葺令，但之後就關人個關，一直無跟進，卒之釀成今次大禍。有立法會議員炮轟屋宇署後知後覺，任由都市炸彈存在，真係無鬧錯。
再講番巡查工作吖，如果政府係有承擔嘅，早就應該咁做啦，唔使依家先至嚟補鑊。計功夫茶話齋，除咗懸臂式簷篷，當局亦應該加派人手巡查其他殘舊簷篷，唔理係懸臂式定猿臂式，一律唔好放過，須知預防勝於補鑊，人命關天喎，唔通要坐以待斃咩！
話時話，港府對簷篷安全嘅監管不嬲都係懶懶閒，檢驗維修工作全部「外判」畀大廈業主負責，呢個做法唔係話唔啱，責任自負吖嘛，之不過，咁唔代表政府可以卸膊吖嘛。事關唔係個個業主都咁有責任心，又或者業主之間意見紛紜以致延誤維修，途人安全就變得毫無保障。日日立於危簷之下，隨時禍從天降，今次百噸簷篷話冧就冧，就係最佳證明啦。
簷篷炸彈防不勝防，以前已發生過多次悲劇，高官可能多數出入中環，所以唔識驚啫。不過咁，我不殺伯仁，伯仁因我而死，如果再發生冧樓死人事故，高官都走唔甩嘅咋。所以咯喎，唔該官僚快快孭番起監管責任，檢視所有威脅市民安全嘅建築物，積極跟進投訴，清拆都市炸彈，唔好再兩頭望吖。
講開又講，不涉及僭建嘅舊樓簷篷話冧就冧，嗰啲僭建物豈不是更加牙煙？嗱，港府唔好諗住拋個「理順」方案出嚟就想過骨呀，凡係僭建物，唔理係高官嘅，或者議員嘅，統統拆無赦！