僭建風暴一發不可收拾，最新落網嘅疑犯竟然係負責執法嘅屋宇署署長區載佳，唉，咁算唔算賊喊捉賊呢？唔怪得特區政府變咗僭建俱樂部，知法犯法嘅高官多到數唔晒啦！
區載佳涉及僭建真係充滿戲劇性同娛樂性。一嚟身為處理僭建物嘅部門首長，其大坑豪園住所被揭發單位露台用玻璃圍封，但無入則申請，經傳媒踢爆後，更遭下屬登門徹查，夠晒滑稽。二嚟咯喎，署長親自示範何謂官字兩個口，醜聞被踢爆後，區載佳仲死撐，辯稱寓所加裝嘅只係「趟窗」，只要唔涉及建築物結構，而工程又喺去年底前完成，就毋須事先申請喎。
好咯，好咯，多得署長主動釋法，「理順」自己嘅僭建醜聞，之前因為誤墮法網而被屋宇署強令清拆嘅小業主，終於明白點解僭建高官充斥成座政府山，原來官字兩個口，乜都係佢哋講晒。
屋宇署護主心切，一改之前對權貴僭建醜聞支吾以對態度，前晚派員視察區載佳寓所，尋晚火速表態指有關趟窗無結構危險，確定工程可豁免審批喎。其實，唔理區載佳寓所嘅趟窗可唔可以獲得豁免，身為執法部門主管，佢應該知道乜嘢叫做瓜田李下啩，高官冇以身作則不特止，仲要走灰色地帶，咁點樣服眾呀？
正如立法會議員話齋，署長未經第三者查驗，就判斷自己住所露台加建屬於豁免工程，明顯存在角色同利益衝突，事件令屋宇署公正形象蕩然無存，署長應該考慮落台謝罪。議員講得冇錯㗎，打個比喻吖，若然警務處處長犯咗刑事罪，然後自己釋法，但凡某年某月某日前犯案，一律豁免刑事追究，咁又得唔得呢？
意圖掩飾錯誤就係處理醜聞危機嘅最大錯誤，功夫茶勸區載佳無謂死撐嘞，只許署長僭建，不許平民違規，平民僭建拆無赦，署長僭建當無事，就算能夠以灰色法例擋得一時，但又點掩得天下人悠悠之口？點擋得住千夫所指吖？怕只怕，你留得住屋企塊趟窗，保唔住屋宇署塊招牌咋！
所以咯喎，區載佳第一件要做嘅事，係向孫明揚局長學習，盡快為自己嘅過失向公眾道歉，千祈咪厚顏無恥兼無腦，學特區「僭建聯」之首曾蔭權咁死不認錯。知唔知吖，撐得到，未必好，撐唔到，盞壞腦嘅咋！
區載佳第二件要做嘅事，係盡快釐清僭建嘅定義，到底邊樣做得，邊樣唔做得，點樣係違規，點樣唔違規，最好寫得一清二楚，以釋公眾疑慮。大家有眼睇啦，煲呔曾明明祖屋僭建，竟然可以話直覺上未必違法，依家署長一句「可獲豁免」又想甩身，有法等於無法，再咁落去，香港法治招牌拆得啦！
一句講晒，特區高官知法犯法僭建，已經犯下大錯，被踢爆後仲任意釋法砌詞狡辯，錯上加錯。區載佳身為打擊僭建大隊長，不如就由你先補鑊啦，下罪己詔之餘，對違法上司一律嚴打，垂範天下，若然可以煞得住呢場權貴僭建歪風咯喎，話唔定可以戴罪立功呢！