神州大地黑心食品氾濫成災，寶島台灣亦唔執輸，含有致癌起雲劑嘅飲品及健康食品行銷全台，事件被形容為台版三聚氰胺毒奶案，有人仲好抵死咁講：台灣終於成為中國嘅一省！
台灣黑心食品風起「雲」湧，一道致癌起雲劑，搞到台灣一鑊泡，風暴愈滾愈大，醜聞愈揭愈臭。睇睇最新發展，近兩百家廠商受牽連，產品超過一百三十種，而且數量不斷增加，污染範圍由飲品、果汁擴大至健康食品，已回收貨量達百萬件，事件引起全台民眾恐慌，要求化驗疑似受污染產品嘅人逼爆台北市衞生局檢驗室。
淪為黑心食品嘅貨品名單水蛇春咁長，繼白蘭氏之後再有知名廠商中招，多款兒童維他命產品證實受到污染，而台灣衞生署為求止血，甚至規定運動飲品等五類產品，只要使用起雲劑都要即時下架。正如台灣國家衞生研究院話齋，今次係人類史上最大嘅塑化劑污染災難。
台灣人以前經常嘲笑大陸係黑心食品世界工廠，點知依家台灣自己亦係咁，五十步笑一百步。唔怪得有人講笑咁講，今次證明大陸台灣一家親，都係龍的傳人、同一品種！
不過，功夫茶真係笑唔出。內地黑心食品早已氾濫成災，依家台灣亦刮起黑心食品風暴，喺國際上真正做到同中國大陸平起平坐，兩岸均無淨土，呢個已經唔單只係食品安全嘅問題，而係關係到整個中華民族存亡嘅問題。
中國人日日食有害食品，再咁落去，唔使日本人封號，中華民族好快變成東亞病夫；唔使八國聯軍入侵，炎黃子孫自相殘殺，遲早喺地球上消失。環顧全球，除咗中國人，仲邊有人會成日喺食品上做手腳，邊有人會對自己同胞落咁嘅毒手呀！
功夫茶咁講可能誇張咗啲，但哀莫大於心死，見到中華民族咁樣自我慢性大屠殺，搞自我種族滅絕，相信任何有良知嘅人都明白呢種心情。醫病治病源，無良奸商為賺黑心錢，以黑心食品靠害同胞，固之然泯滅天良。之但係咁，呢個世界無奸官，又邊度嚟咁多奸商吖，所以，中國當權者係時候從大國崛起嘅幻夢中醒醒喇，奸官不除，禍國殃民，官商勾結嘅毒禍唔根治，黑心食品氾濫，人民食不安枕，所謂大國崛起，根本就係笑話！
功夫茶提多一句，黑心食品肆虐兩岸，港府咪以為可以置身度外呀。呢，台灣問題鈣片及內地致癌爆炸西瓜已經入侵香港，當局應該追查毒源，認真把關，以前孔雀石綠水產、蘇丹紅禽蛋同三聚氰胺奶粉都係外地先發現，港府至如夢初醒。一句講晒，如果再有黑心食品流入本港，港府就係罪人！