社署一味諗縮數　鼓勵寄養得把口

社署由今年四月新財政年度起，將每月發放嘅寄養兒童生活費調高十四蚊，計落平均每日只係多四毫六仙幾咁大把，寄養家長睇住呢份「大禮」，都唔知笑好定喊好。家陣百物騰貴，柴米油鹽樣樣加，寄養津貼加幾毫，正一買鹽都唔鹹，咁鬼奀，社署不如索性原地踏步一個崩唔加，起碼唔使咁肉酸。

嗱，即管睇吓社署有乜解釋。佢哋話，調整係因應「整體物價」作出。之但係，寄養兒童生活費調整幅度數字顯示，過去四個財政年度平均每年每月只係加大約四十三蚊，今個財政年度增幅奀得更離譜，只得百分之零點四六，同本港現時百分之四點六嘅通脹率比較，根本唔成比例。

嗱，等功夫茶畀另一條數班官老爺睇吓。依家寄養家庭每月獲社署發放寄養兒童生活費三千零七十幾蚊，寄養家長有一千五百幾蚊獎勵金。有位寄養家長要照顧三歲幾嘅唐氏綜合症兒童，小朋友仲未戒奶、戒片，而且有聽障，除咗要買質料好啲嘅衣物，以及營養師指定嘅奶粉同營養粉，寄養家長仲不時因為驚耽誤病情，要帶小朋友去睇私家醫生。

家陣起居生活樣樣使費都起價，社署官員就算唔用計數機，數吓手指都知，寄養家長貼埋獎勵金都唔夠冚數。每日加唔夠五毫子，連杯水車薪都算唔上，簡直就係滴水車薪，有冇少啲吖？

最離譜就係，港府對寄養家庭孤寒到冇朋友，斤斤計較，樣樣算到盡，通脹率接近百分之五，而津貼上調連百分之零點五都冇，但係對自己友就大方到加零一。

呢，當局啱啱拍板公務員今年個個有人工加，中低級公務員加百分之六點一六，高級公務員加幅更超過百分之七。公僕加薪幅度高到連工會都話「喜出望外」，難為寄養家長捉襟見肘，面對通脹欲哭無淚，官貴民賤，果然係同人唔同命。

話時話吖，本港家庭問題愈來愈嚴重，需要入住寄養家庭嘅兒童不斷增加，但港府為官不仁，只顧自肥懶理民間疾苦，資源短缺，支援不足，可提供寄養家庭數目最多只夠勉強應付需求，家陣全港仲有不少兒童等緊寄養服務，根本供不應求。

計功夫茶話齋，如果當局真係有心照顧呢班小朋友嘅，就應該提供足夠資源同更具吸引力嘅獎勵金，按照物價水平、通脹幅度調整津貼，鼓勵更多家庭參與寄養服務，而唔係一味諗縮數，每年係咁意加雞碎咁多生活費津貼就關人個關。