夫妻之道，有人話唔係「無聲勝有聲」，而係「凡事有得傾」；之不過，有啲嘢，依然係無聲勝有聲妙，愛在心裏口難言是一種回憶，否則，說出來被拒絕，反而露底，自討尷尬！
一個向來浮誇、愛吹水嘅人，係唔會忽然變得謙厚務實嘅！好似貪曾呢種積極主動、貪念強盛嘅人，有乜可能有筍嘢唔會如燈蛾撲火飛身過去啊！家陣佢又被踢爆大話連篇，發聲明話自己政協名單落榜，係自己「鑑於廉政公署的有關調查」，經慎重考慮，現階段並不適合參與全國政協的高層工作喎！
所謂「現階段並不適合」，除了「死鴨撐飯蓋」、「跌咗落地都要揦番拃沙」，貪曾仲學泥水工人開多個後門畀自己，喺聲明話「期望有關調查結案後，可以還有機會繼續貢獻國家，為香港服務」，阿哥，一個貪遍省港澳嘅曾爵士，在位時唔識「貢獻國家」，唔盡心「服務香港」，只識做離岸特首，豪住總統套房，發春秋大夢，如今一身蟻才發出吼聲話要「為國為港」，搞笑啲啩？
貪曾嘅聲明，依老朽分析，並非全不可取，起碼教大家乜叫「悖論」！即係話，佢嘅表白，內心往往對「有關職銜」的關係形式，依然存着無限憧憬和幻想，一邊拒絕一邊渴望！
另一可取處，原來貪曾不但貪得「理曲氣壯」，仲識玩「燒胎」絕技！這是一種汽車表演特技，車輛在原地不動情況下，輪胎高速空轉摩擦出大量煙霧，一般用於調動觀眾情緒，電影裏面有飛車鏡頭必有此一幕！然而貪曾禍港七年，再多煙霧都遮唔到佢啲劣行！要繼續「貢獻國家」，睇怕冇時間咯！