新政府口口聲聲話「民生無小事」，於是有扶貧委員會。日前，領導該會嘅政務司司長林鄭月娥預計，貧窮線最快十月制訂。嘩！要咁耐？社聯最新數字顯示，香港貧窮人口已升至二○一二年上半年嘅一百一十八萬七千人，而貧窮長者更由二十五萬五千人增加到三十萬五千人，即係平均三個老人一個貧窮。政府急市民之急，訂條貧窮線都要成十個月，扶得貧來肯定餓死唔少老人喇！咁又唔使咁驚青，林鄭話扶貧措施唔一定要等貧窮線制訂後才能出台，咁就要睇吓財爺下個月公布嘅財政預算案，有乜紓困措施救貧窮線下掙扎嘅蟻民喇！
新政府開局逾半年，政策推出一項跪低一項。講真，貧窮線畢竟不同o靚模嘅事業線，一夾就有，所以最快十月才可制訂，有道理有道理！
所謂「貧窮線」，據「經濟合作與發展組織」對貧窮家庭的定義是，家庭人均入息少於整體人均住戶入息中位數的一半。政府統計處嘅數字顯示，去年本港整體人均住戶入息中位數是每月五千元，換言之一個四人家庭嘅貧窮線便是一萬元。
老朽愚騃，未知制訂咗貧窮線，係咪貧窮問題就可以解決？或者好似聖經咁講，說出了心中痛苦，痛苦就減半；訂出了貧窮線，貧窮人口就減半？如果係，就真係神奇過o靚模嘅事業線咯！
政府庫房水浸，扶貧真係要加把勁，家陣牛肉豬肉貴到冇朋友，一身綺羅嘅高官，千祈唔好走出來高呼「素食養身」、「布衣救國」嘅謬論。計老朽話，財爺都係派錢最實惠！否則，餓民起義，香港無寧日也！