有首歌係咁唱嘅：「小呀小兒郎，背着那書包上學堂，不怕太陽曬，也不怕那風雨狂……」無錯，今時今日學生返學唔怕太陽曬，唔怕風雨狂，不過弊在怕學額短缺，怕跨區返學呢！
嗱，隨着跨境及雙非學童愈來愈多，北區學額短缺問題愈演愈烈，教育局承認新學年欠缺一千四百個小一學額，搞到唔少本地學童被迫跨區返學，唔止擔心日曬雨淋，仲要擔心舟車勞頓，唔怕就假！
讀書郎，好徬徨，官老爺點做呢？補鑊囉。教育局局長吳克儉宣布，將會透過改建同增建課室，以及每班加派等措施增加北區學額，照顧北區學童原區就讀嘅意願。佢仲話，有信心校舍工程能夠趕及下學年完成，一四至一五年度起會有足夠學額供應，叫今年六月統一派位被派往大埔區嘅學童向當局求助，話可以安排佢哋原區上學喎。
遲到好過無到，當局嘅補鑊行動係就係遲晒大到，抵打手板o架嘞，不過總算踏出咗一步，或者可以解到燃眉之急嘅，希望吳克儉今次生生性性，唔好講完就算數，搞到一鑊粥啦。咪話功夫茶唔提醒，官老爺推銷國民教育失敗，被人批評洗腦，如果處理學額短缺問題又失職，家長隨時佔據政府總部廣場都似，到時你哋唔慌唔洗腦喇。
功夫茶唔係靠嚇o架。古人話學無前後，達者為先；家陣係學額無前後，達者為先。雙非學童源源不絕南下搶位，就算今年補咗鑊，明年一樣出問題嘅咋。官老爺自己都識講啦，估計二十萬雙非兒童中，會有一半來港讀書，北區首當其衝，小一學額仲唔爭崩頭咩，官老爺到時至嚟補鑊就遲過頭咯。仲有吖，萬一唔止一半雙非兒童回流讀書，咁又點算呢？你知港產官僚年年都估錯數嘅喇。
真係唔知好嬲定好笑，香港好似回到三年零八個月嘅淪陷歲月，奶粉短缺，學額短缺，搞到家長頻頻撲撲，乜都要配給咁滯。唉，無計啦，鬼叫香港有個「痛心特首」咩，曾蔭權爵士在位七年，貪遍省港澳，歎盡海陸空，對雙非問題唔理，對水貨炸彈唔拆，對學額短缺唔顧，留低一大堆爛攤子，港人唔愁就假啦。難為貪曾仲癡心妄想要做國家領導人，衰過人佢就做到足！
一句講晒，學額不足稚子苦，未雨綢繆莫靠估。吳克儉，學額短缺呢隻鑊你補硬o架嘞，快啲未雨綢繆，搞好長遠規劃，千祈唔好搞到連小學生都要上街抗議呀！