地下水管出問題，已成香港一奇景：上月灣仔堅拿道西才爆地底食水管，噴出的水柱一度高達二十米，要通宵修復；早幾日，英皇道一條主要食水管嚴重滲漏，搞到東區十五萬人斷水十一小時，由於選擇性通報，不少居民來不及準備儲水，自然怨聲載道。
關乎民生嘅嘢，政府應該一早未雨綢繆。明知香港大部分水管已用了很長時間，退化老化是必然的，水務署亦都知，於是早於二○○○年推出十五年的「更換及修復水管工程」，期望至二○一五年更換全港長約三千公里地底食水管，可惜，工程進展慢如蝸牛，地下水管爆完一條又一條。有道是：「所有的好觀點加起來，都抵不上一個好行為。」政府高官一味話十五年計劃的前期主要進行研究和勘探，真正動工要在中後期，再吹吓水，睇怕人類已移居土星，而香港地下水管爆破依然比煙花燦爛！
真係唔講唔知，水務署成日叫人「節約用水」，可是最浪費食水嘅就係佢哋自己！小數怕長計，有團體計過，水務署去年因地底水管滲漏，損失的潛在水費收入，再加上支付廣東省購買的「東江水」，總額介乎十七億至二十六億元不等。
水務署推算，今年全年滲漏率只會微降至百分之二十，以輸出食水約九點五億立方米及支付東江水費用進一步升至三十一點四六億元估算，全年預計又有十七億至二十五億元被滲去。
可見水務署最浪費食水，差不多年年唔見二十億元，換言之，成二百億元就咁滲吓滲吓唔見咗！水務署署長，快拿點「應有之義」出來！