香港貧富懸殊問題嚴重，連國家領導人都要多次「提醒」港府要處理好由此衍生嘅社會深層次矛盾。不過，尋日勞工及福利局局長張建宗竟然肆意詮釋貧富懸殊嘅計法，話○八年香港最低收入家庭月入二千八百元，但計埋政府提供嘅社會福利「財富轉移」，月入即時增加一倍至五千六百元，而有錢人除稅後月入少咗百分之八點七。佢亂改貧富懸殊嘅計法無非想為政府扶貧不力開脫，結果被一眾勞工界議員狂插，話佢涼薄。