一個笨蛋社會，經常會出現混亂的現象。學生資助辦事處最近的傑作——每年接獲約四萬至五萬宗幼稚園學費減免申請，在完成家庭入息審查後，每年有三、四萬宗個案獲批資助。在本學年首月，處方已處理約九千宗申請，當中三千宗獲全額資助，獲四分三寬免及半額資助者各有二千宗。
在扣除學券後，獲評可得半額資助的半日制幼稚園學生，不會得到任何額外資助。搞笑嘅動作就喺呢度——獲四分三寬免的學生，則每人每月可得二元五角，學資處以四捨五入方式計算後，每人每月實際可獲三元資助。
阿哥，呢三蚊真係大過天？你哋知唔知啲一毫、二毫及五毫的「神沙」，平時攞住佢到街市買餸或去茶餐廳埋單找數，都會畀人怒睥！據估計，港人家中的「散銀」，閒閒地逾三億元！嘩！學資處畀三蚊資助人，真係衰過叫人去攞三蚊「神沙」！你哋咁腦殘，難怪家長、校方怒斥荒謬，學者則怒轟浪費行政費。咁又係，寄封通知信都要一元四角啦！老朽本銀行紅簿仔唔夠五千元存款，都畀銀行狠狠扣去五十個大洋！呢三蚊，留番你哋買糖食啦！
一個笨蛋社會，養了一班腦殘官員，這個世界會好嗎？老朽相信，學資處若然調去管理動物園，則東北虎、國寶熊貓必定被你哋養死！臨斷氣時恐怕會用盡平生一口氣唱道：點解餐餐都咁少餸？雞又瘦，竹又黃！
親愛的家長，面對一個笨蛋社會，請息怒以免激親自己，否則要入公家醫院仲大鑊！條氣晤順呀？咪制！呢處早已冇藍天綠地。