姚明復出贏口碑

火箭僅輸湖人兩分

火箭頭三節均領先主場嘅湖人，直至第四節先畀主隊反先，火箭完場前兩秒有起手機會，可惜布魯克斯上籃失敗，最終輸110比112。今仗得分最高係29分嘅湖人中鋒加素，另外高比拜仁亦有27分進帳。火箭主將奇雲馬田則貢獻26分。

姚明今仗上陣23分鐘，取得9分及11個籃板，表現不俗，佢比賽後立即返回更衣室敷冰，好好保護雙腳。打完呢場揭幕戰，姚明喺今日作客勇士嘅賽事將休息，以免操勞過度。

相反，賽前被睇淡嘅塞爾特人，除「舊三巨頭」加納特、皮雅斯及雷阿倫皆發揮正常外，朗度亦有上佳演出，個人交出17次助攻，加上倒戈嘅奧尼爾亦幫到手，結果塞爾特人由頭帶到尾，以88比80擊敗熱火，打開今季勝利之門。

輸波嘅勒邦占士賽後就在個人微博表示，羅馬並非一天建成，所以新組嘅熱火仍需時間增添默契，希望球迷體諒。至於韋迪未對輸波失望，並表示今場只係82場常規賽嘅其中一場，毋須太過憂慮。不過，熱火當務之急必須正視默契問題，球隊今場就做出多達17次失誤，反映熱火默契不足，才會不斷犯錯。