西諺有云︰a friend in need is a friend indeed。對於假難民大軍嚟講，美國狂人總統對非法入境者「零容忍」，歐洲關上大門，連最仁慈嘅德國默克爾大嬸都收番「來者不拒」，放眼全球，只有港府張開雙臂倒屣相迎，呢啲咪患難見真情囉！
呢嗱，警方商業罪案調查科探員尋日突擊搜查土瓜灣一個酒店單位，檢獲幾十張懷疑偽鈔及工具，拘捕兩名疑犯，其中一人係持「行街紙」嘅印度裔男子。一般市民聽見南亞兵團，即時諗起嗰啲替黑幫進行睇場、開片、運毒等活動嘅粗人，事實證明，港府對假難民大愛包容，「不拘一格」，高科技罪犯一樣無任歡迎。
當然啦，講到高科技罪犯，其實太「抬舉」佢哋嘞。事關班友製作嘅手法相當山寨，既冇防偽金屬線同動感變色圖，紙質又差，好易畀人識穿。講開又講，南亞兵團之前亦試過用假信用卡，結果同樣犯低級錯誤，因為簽名冒得唔似當場斷正。好明顯，南亞兵團搵真銀嘅瓣數，同香港經濟結構一樣，都有非常大嘅拓展空間。
不過唔緊要吖，自古成功在嘗試，反正時間多的是。係人都知，假難民一張「行街紙」在手，鍾意留幾耐就幾耐，打黑工、強姦、非禮、加入黑社會、打劫金舖食大茶飯等，悉隨尊便，甚至喺香港指揮境外恐怖活動都仲得，區區整幾張偽鈔，簡直閒過立秋。有專家講過，任何人喺任何技術練習一萬小時都可以成為大師，偽鈔、假卡大王並不是夢。
至於賴死唔走打官司嘅錢，假難民亦唔使操心，唔單止有公帑埋單，仲有「假難民之父」之稱嘅政客同人權組織等住幫手。唔好彩被判入獄咩，咪當轉個環境度吓假囉，入面有家鄉菜侍候，病咗有醫生睇，邊個夠膽恰你，大可以告到佢哋甩褲，香港法官出名慈悲為懷，分分鐘大筆一揮，送你豐厚路費，衣錦還鄉，到時連印假銀紙嘅力都慳番！
假難民喺香港，衣、食、行樣樣都冇得彈，唯獨住呢方面略嫌美中不足，喂，淨係要人哋屈就喺深水埗天橋底木板屋，講出嚟都已經羞家喇。計功夫茶話齋，高官既然講到咁大愛包容，好應該救人救到底，就算唔讓個禮賓府官邸出嚟，最起碼都開放政總「門常開」，等假難民感受吓綠草如茵嘅大自然氣息同埋無敵海景都好吖！
中國人有句老話︰滴水之恩，湧泉相報。假難民係時候用烏都文同印度文整把萬民傘畀港府，等班官老爺可以喺國際社會大肆宣傳，話唔定可以撈番個諾貝爾「假仁假義獎」！