好耐以前中國未有文字，一切僅憑口耳相傳，後人稱為「傳疑時代」，估唔到今時今日香港科技發達，一樣處於「全疑時代」。鬼咩，騙徒手法層出不窮，銀紙難民行街紙乜鬼都有假，就連高官實牙實齒嘅「法治精神」，原來都係西貝貨，市民唔打醒十二分精神抱懷疑態度，盞自己蝕底嘅咋！
呢，就好似近日愈來愈氾濫嘅假銀紙咁吖，警方日前喺土瓜灣搗破咗個偽鈔工場，產品幾可亂真，部分已經流入市面。功夫茶提提大家，如果唔想矇查查中咗招都唔知咩事，記得黐實東網，學吓點樣四招分清銀紙真偽喇！
好嘞，言歸正傳。南亞假難民點樣作奸犯科、禍港殃民，正義傳媒以及社會上有識之士早就講到口水乾，可惜港府硬係借咗聾耳陳隻耳，一味開門揖盜，假難民嚟到只要舉手提出免遣返聲請，一張行街紙在手，做黑工、印偽鈔、製販槍械悉隨尊便。上述偽鈔工場被捕嘅三個疑犯當中，就有一個手持偽造行街紙。假難民持假行街紙製作假鈔，除咗充滿黑色幽默，亦足以證明行街紙已經淪為罪犯通行證，有價有市。
鬼咩，港府對南亞治安毒瘤束手無策，一早扯晒白旗，淨係睇吓臭名遠播嘅深水埗通州街天橋底「南亞村」就知咩事。前兩日有個案底纍纍嘅越南裔女子放火燒村，民政事務處、社會福利署、食環署等衙門急急腳補鑊執手尾。六大衙門平時互相扯皮「六不管」，再唔係就做騷咁做，求其拆一間半間木板屋就當交咗功課，相比起假難民製假鈔，廢官僚假執法簡直係五十步笑百步。唔怕唔識貨，最怕貨比貨，有人話越南「女俠」嘅一把火勝過六大衙門執法，效率遠超一眾日進斗金嘅港產高官，唔係冇道理o架。
講開又講，南亞幫打家劫舍食大茶飯，「難民」個朵固然係假，香港地犯法嘅唔單止唔使受罰，仲可也文也武，「法治之都」招牌同樣係流。唔係咩，當局呢頭話依法取締香港民族黨，嗰頭玩放生延長對方申述期限，眼白白睇住人哋大搖大擺接受外部勢力邀請播毒，港府成隻鵪鶉咁，淨係話「可惜」同「遺憾」，（手爪）痕都冇力；牽涉佔中、政治黑金案同刑事恐嚇東方記者嘅漢奸黎，到依家毛都冇少一條，就更加唔在講喇。
港府對漢奸洋奴港獨分子畏首畏尾，投鼠忌器，變相為佢哋鳴鑼開道，令人思疑高官宣誓效忠國家、特首「好打得」之名統統都係假嘅。當然喇，乜嘢都係假，唯獨高官每個月（手豆）嘅花花綠綠銀紙，珍珠都冇咁真，你吹得佢脹呀！