香港人對賣旗籌款一啲都唔陌生，不過啲善款最終有幾多真正落到去有需要嘅人身上，根本冇人話得埋，事關社署嗰班官老爺平時烏眉瞌睡，香港淪為慈善騙子搵食天堂有乜出奇。
呢嗱，社署尋日發出通知，唔批准香港聾人協進會（聾協）九月八日賣旗籌款，理由係唔符合申請資格。因乜解究搞成咁？心水清嘅都會諗到，應該同聾協近來屢生風波有關。聾協試過有人闖入辦公室擅自使用電腦，驚動警察到場；又有二十幾個前會員拉大隊報警，指協會帳目及人事混亂，仲大爆四年前嘅賣旗籌款，話就話係為聾人子女開幼稚園，點知有大約一百三十萬元善款轉咗去間私人公司。兩個月前仲有人入稟法院，聲稱任職聾協期間被禁止接觸財務資料，復被人誤導簽字，要求法庭下令罷免聾協有關負責人。可想而知，呢間歷史悠久嘅慈善機構係幾咁烏煙瘴氣，簡直亂過亂世佳人。
聾協到底發生乜嘢事，外界無從置喙，要社署認真查過先知。家陣最大嘅問題係社署好似借咗聾耳陳隻耳咁，對聾協內亂聽而不聞，見而不理，事件最終鬧上法庭，即係話社署做唔到嘢，係廢(o架)啦。係呀，聾協問題舊年初已曝光，社署拖咗年幾都冇做嘢，唔通否決人哋賣旗申請就當履行咗監管責任？
查實爆醜聞嘅點止聾協吖，審計署早前發表報告，一嘢踢爆慈善機構好多亂象，好似有慈善機構董事坐擁高薪、濫用交通津貼，有慈善機構嘅行政費過高，有慈善機構帳目不清。唔使問，社署尸位素餐，唔監唔管，啲騙子仲唔大搞掛慈善羊頭，賣牟利狗肉嘅把戲咩，可憐市民愛心爆棚，踴躍捐輸，結果益咗騙子嘅荷包。
講到呢度，令人諗起反腐嘅「馬桶理論」，一個機構將啲羞家醜聞收收埋埋，就好似將馬桶蓋冚實，只要一日唔打開，外表望落依然係咁光鮮、乾淨，之不過一旦揭開馬桶蓋，入面啲臭味就溢晒出嚟，令人作嘔。香港就係咁，假慈善機構充斥，呃市民嘅善心，近年唔少偽慈善機構曝光，照理講官老爺應該順藤摸瓜，查清查楚畀公眾一個交代，點知佢哋又聾又啞不特止，仲失去嗅覺，乜都唔做，話佢哋係騙子幫兇，一點都冇冤枉。
功夫茶絕對相信，香港大多數慈善機構係好嘅，只不過一粒老鼠屎搞壞一鍋粥，社署對少數騙子縱容，令到真正嘅慈善機構「躺着也中槍」，到頭來受害嘅始終係最需要幫助嗰一群。內地紅十字會貪腐醜聞多到爆，善款數字跌到阿媽都唔認得，就係前車之鑑。