最近電視台報道賊人開車撞警察嘅新聞，字幕寫咗別字，變成「探員連開兩窗」，結果被網民洗版恥笑。其實喺香港地，窗都可以係殺人武器，事關耐唔耐就有途人被飛天鋁窗擊中，甚至有大廈窗戶呢頭驗完窗，嗰頭飛落街，想唔講句屋宇署「強制驗窗計劃」廢都唔得喇。
嗱，申訴專員公署近期接獲五十宗關於強制驗窗嘅投訴，於是主動調查屋宇署幾冇料到。有業主尋日就踢爆驗窗界「無王管」嘅亂象，由於市民無法查證驗窗師傅嘅專業資歷，好多時錢使咗，甚至收埋驗窗合格證明，都唔等於安全，隻窗甚至出現損毀，萬一跌落街傷到人就大鑊，所以要求當局立例強制驗窗公司購買第三者責任保險喎。仲有呀，有業主被開天索價，屋苑甚至出現圍標，簡直沒有最亂，只有更亂。
點解驗窗師傅質素良莠不齊？鬼咩，家陣喺香港做驗窗師傅話都冇咁易，只要完成六粒鐘培訓課程，就獲發小型工程第三級牌照，可以申請「驗窗卡」。喂，學生哥返一日學都唔止六粒鐘喇，咁短時間就可以考取專業資格，有冇再兒戲啲呀？更重要係，課程根本冇教人點樣驗窗，大家鍾意點驗就點驗，唔怪得香港咁多飛天鋁窗咯。
大家都知，香港因為接連發生墜窗傷人事故，港府六年前急急推出強制驗窗計劃，但凡樓齡達十年或以上嘅私樓，業主須搵合資格人士驗窗同維修。表面睇，呢個計劃好似好為市民安全着想，實際上，只係港府亡羊補牢嘅屎橋。最弊係屋宇署搞咗個計劃出嚟就乜都唔理，連驗窗師傅嘅專業水平都係半桶水，試問點樣防止墜窗事故再次發生呢？好似舊年咁，有架巴士喺深水埗被高空跌落嚟嘅窗擊中，已經算係不幸中之大幸喇，若果「中頭獎」嘅唔係巴士而係途人，後果真係不堪設想。睇到喇，旨意屋宇署監管強制驗窗計劃喎，不如市民戴頭盔出街好過。
再講吖，屋宇署向來做嘢都係胡混度日，最離譜係有業主明明完成強制驗窗程序，屋宇署竟然話冇相關紀錄。有啲畸士就係屋宇署發信叫業主驗窗，點知發完信就算，之後就關人個關，有個案足足拖咗三年。所以話啫，屋宇署劣迹斑斑，無論搞清拆危險招牌定係強制驗窗，統統有頭威冇尾陣，港產官僚講咗當做咗，有乜辦法唔亂象叢生吖。
都係嗰句喇，官僚靠得住，豬乸會上樹。香港自詡安全城市，其實危機四伏，露台倒塌、大樹倒塌、招牌倒塌、鋁窗飛街，行街隨時中頭獎，唔驚就假。好心喇，官老爺幾時至肯帶個心返工，唔好再靠害市民呀？