「講你又唔聽，聽你又唔明，明你又唔做，做你又做錯……」港產官僚出名四方木，唔踢唔郁，用呢幾句歌詞形容佢哋，真係貼切不過。
今年二月大埔公路一架九巴翻側，導致十幾人死亡，政府之後成立嘅檢討委員會尋日開會，結果例牌菜又係淪為廢官聲討大會。有大埔區議員話，一直有向運輸署投訴大埔公路多快車擾民，一五年更去信該署要求降低部分路段時速限制，點知對方一句話要諮詢居民就冇影；叫警方加設「快相機」咩，佢哋又將個波大腳傳番畀運輸署，即使到咗二月爆大鑊之後，官老爺都仲未識驚，話要到年底前至可以裝妥快相機，急驚風遇着慢郎中，問你怕未！
咁運輸署又點解畫？佢哋話當局訂快相機要一批過訂，加上安裝前除咗要經運輸署，仲要路政署、機電署以及警方等多個部門批核。真相大白嘞，原來又係三個和尚冇水飲惹的禍。係人都知，港產官僚冇嘢叻，最叻就係互相扯皮，之前將軍澳甚至試過有居民通街晾衫，各大衙門你眼望我眼，結果居然要出動政務司司長收拾殘局。講真，如果香港地真係「官多好辦事」，深水埗通州街天橋底就唔會被南亞幫攻陷，淪為食環署、路政署、地政總署、康文署等部門「六不管」地帶喇。
講番巴士安全問題，唔講唔知，淨係過去五年巴士意外已經造成超過一萬一千人死傷，巴士之所以化身「大殺傷力武器」，官老爺冇監冇管，絕對難辭其咎。唔使講第樣，淨係講巴士司機作息時間，當局話就話有制訂指引，但一來指引冇約束力，巴士公司跟就人情唔跟就道理；二來指引規定車長每日工作上限長達十四粒鐘，車長烏眉瞌睡，百幾個乘客條命分分鐘凍過水，港產官僚闊佬懶理，同草菅人命冇乜分別。
既然港府都唔嗲唔吊，巴士公司自然冇你咁好氣，叫佢哋裝安全帶，就話會引發乘客同車長衝突；整個黑盒又「偷工減料」，明明黑盒可以每五秒傳送一次資料，巴士公司唔知係咪想慳錢，硬係要降低標準到每三十秒一次；明明廠商有技術實時監察司機駕駛表現，巴士公司連購買相關軟件都嫌費事。至於招聘以及培訓新人，巴士公司更加係有咁鐸叔得咁鐸叔，咁搞法，唔出事至奇。
最惡頂嘅係，巴士公司安全同服務質素每況愈下，加價就鬼打冇咁精神，新巴、城巴最近申請加價十二個巴仙，仲狼過去搶。不過市民旨意官老爺把關，睇怕都係慳番啖氣暖肚好過，事關講到收費一流，服務九流，港產官僚認第二冇人敢認第一，其身不正，何以正人吖！