港府靠得住，豬乸會上樹。港產官僚硬銷嘅「自製長糧」年金計劃尋日截止認購登記，反應冷淡到連年金公司高層都唔好意思實話實說，一味死撐話係預期之內就算。梗係喇，年金回本期長，擺明搵長者笨，難聽啲講句，隨時有錢冇命享，你話港府邊有好帶挈吖。
嗱，本報記者尋日去銀行睇吓年金認購情況，唔止交表嘅長者少之又少，唔少公公婆婆直情話有錢都唔會買年金，寧願放喺銀行收息，或者買藍籌股喎。咁又係呀，以投保一百萬元計算，每月領取五千幾蚊，睇落好似唔錯，但魔鬼在細節裏，男性投保人要十五年先至回本，供完已經八十歲，女性回本期就更長。即係話，將自己棺材本擺喺人哋嗰度十幾年，期間由對方每月畀番些少錢你，根本冇乜着數，萬一有急病要用錢，提早取回仲要蝕本添，咁做乜唔將啲錢放喺自己口袋喎。
人老精、鬼老靈，公公婆婆梗係識揀喇。難怪當局一味顧左右而言他，淨係話發行總金額一百億元料可全數吸納認購需求喎。喂，當初推銷年金嗰陣，財爺波叔唔係好口響咁話，預計反應熱烈，首次發行額度可加碼至二百億元嘅咩？結果不但唔使加碼，直情連首一百億元都cover有凸，證明老人家心水最清。最好笑係，網上認購登記因為出現故障，延至今日先至截止。好心啦，連認購登記都甩甩漏漏，開壞個頭咯喎，年金計劃有冇好結果，諗都諗到嘞。
其實，年金計劃反應冷淡，社會早已預期，就算出動天王巨星賣廣告都冇面畀。點解咁講？除咗回本期太長呢個弊端，仲有就係年金計劃冇計及通脹因素。試諗吓，十五年前嘅物價同家陣相差幾遠呢？去超市打個轉，就知柴米油鹽百物騰貴，年金最少十五年先至回本，期間銀紙不斷貶值，每月幾千蚊，好睇唔好食嘅咋。再講吖，邊個人可以保證自己活到幾多歲呢？萬一回本前已經百年歸老，咁咪即係盞搞。
講到尾，最需要晚年生活保障嘅係基層長者，而唔係有大筆閒錢買年金嘅富貴長者。可惜吖，港府嫌貧愛富，年金又好，富貴長者屋又好，銀色債券都好，全部都係錦上添花，而唔係雪中送炭。有組織訪問過百名基層長者，八成話買唔起年金。港產官僚食好住好，點會明白基層苦況吖。
港府就係咁嘅嘞，庫房肥到漏油，偏偏對老人家斤斤計較，既拒絕推行全民退保，甚至連增加長者資助宿位都係光說不練，寧願將財政儲備留畀高官及公務員咬長糧。呢啲咪就係古人所講，殘民自肥嘅「碩鼠」囉。