「落花滿天蔽月光，借一杯附薦鳳台上。」相信冇乜人未聽過《帝女花》嘞，粵劇有幾深入民心可想而知。不過隨住時代變遷，粵劇出現傳承問題，業界破天荒同洋人crossover，合作推出全球首個粵曲認證機制，有得諗o架。
係咁嘅，香港粵劇學者協會同西倫敦大學倫敦音樂學院合作，推出全球首個粵曲考級試，好似考鋼琴咁分成一至八級。正如粵劇名伶阮兆輝話齋，喺香港掛個招牌就教得粵曲，根本唔知教成點，家陣有制度可依，有助規範及提升業界教學質素，培育人才，係中國嶺南傳統戲曲藝術衝出國際嘅重要一步。
當然喇，家陣嘅香港做乜都有人反對，可能有人會話，粵曲係中國國粹，洋人識條鐵咩？其實業界都有呢個擔憂，所以考級試暫時只會喺香港設立考場，由粵劇界資深人士擔任考官，未來再逐步爭取倫敦音樂學院嘅資歷認證。咁講啦，要令粵劇國際化，獲更多人認識同喜愛，借助「外國勢力」不失為好辦法，始終倫敦音樂學院歷史悠久，係金漆招牌。何況有麝自然香，洋人爭住合作，證明粵曲係好東西喇。
話時話，業界搞呢個考級試，足足醞釀咗十幾年，話係出心出力、鞠躬盡瘁都冇誇張。但奇怪嘅係，口口聲聲要推動中國文化嘅港府，咁多年來究竟做過啲乜呢？咪睇港府年年向一班大老倌頒授乜星章、物勳章，擺出重視姿態，其實葉公好龍嘅咋，一講到錢同場地咯喎，耍手擰頭唯恐不及。淨係有「粵劇殿堂」之稱嘅新光戲院屢次爆出結業風波，咪就係政府縮骨，停止資助劇團租用新光場地所致囉，如果唔係有心人自掏腰包，靠政府真係蚊都瞓蛇都死。
唔知係咪畀人鬧得多，港府近年總算做番些少嘢，好似油麻地戲院、高山劇場紛紛成為粵劇表演場地，咁當然係好事，弊在呢啲場地始終認受性不足，觀眾有限，聊勝於無。本來呢，業界對號稱世界級嘅西九戲曲中心寄以厚望，可惜吖，西九延誤復延誤，超支復超支，望穿秋水都未落成，早就淪為世界級笑話。當局話就話戲曲中心今年底開幕，聽住先喇，隨時有變卦都唔出奇嘅咋。
冇符喇，香港不嬲係文化沙漠，高官淨係識得附庸風雅加吹水，鬼知道乜嘢叫文化藝術咩，好似有機會問鼎諾貝爾文學獎嘅大作家作品被評級為鹹書，世界著名大衞像被勒令包膠套，呢類笑話數天光都數唔完。所以咯喎，粵劇呢啲非物質文化遺產，洋人識欣賞，港產官僚識條鐵就真！