做人做事，要年年進步固然唔容易，但Keep住年年退步亦唔簡單，咁難嘅事都畀國泰做到，唔到你唔服。係呀，因管理不善而喺全球最佳航空公司排名節節下跌嘅國泰航空，排名又跌嘞，不如大家估吓，國泰幾時會跌到排名倒數第一呢？
嗱，有「航空界奧斯卡」之稱嘅Skytrax，日前公布本年度最佳航空公司排名，結果不出所料，香港代表國泰航空排名拾級而下，由去年第五跌落第六，已經連續四年下跌嘞，仲要由排名全球第一名開始跌起，都咪話唔羞家。難怪唔少人預測，不出幾年國泰就會跌出榜外，影都冇嗰隻吖。
身為香港人，對於呢個結果雖然與有辱焉，但諗落一啲都唔出奇。調查機構針對航空公司嘅機上餐點、客艙環境、座椅等細項進行嚴格評選，受訪旅客超過一千八百萬人次，而國泰近年事故五花八門，無奇不有，好似機艙行李門壞咗，搞到乘客等極都攞唔到行李；又好似國泰姊妹公司港龍嘅乘客喺餐盤野生捕獲「小強」，真係只有估唔到，沒有國泰做唔到嗰隻。至於座椅愈來愈窄、餐飲愈來愈差、電視耳機失靈、空服人員黑面更係不在話下。莫講話同新加坡、卡塔爾呢啲高質航空公司冇得揮，家陣就連台灣嘅長榮都爬埋頭，畀人話衰過廉航就係咁解。
都未計航班延誤、機票超賣、當乘客人球咁踢、飛機故障嗰啲衰嘢，簡直數天光都數唔完。呢，就呢個月之嘛，一班由香港飛首爾嘅國泰客機，臨起飛先至瀨尿，發現機件有問題需要緊急維修喎，乘客焗住喺機艙呆等四粒鐘，真係人都癲。另外，上月一班由泰國布吉飛香港嘅港龍客機，嚴重延誤十九粒鐘，國泰港龍唔止冇賠償，連道歉都冇句。你話喇，今時今日咁嘅服務態度，國泰點同其他航空公司鬥吖？
正如內地順口溜話齋，「問題在下面，根子在上面。」國泰由全球首屈一指嘅航空公司，變成臭名遠揚嘅「因航」，源頭當然喺管理層嗰度啦。大家有眼見，這些年國泰管理層不務正業，眼光奇差，炒賣期油錄得巨額虧損已經夠衰，仲要入前線員工嘅數，裁員不斷咯喎，士氣自然低沉，勞方郁啲罷工，陷入惡性循環，進一步拖累服務同安全水準，乘客貼錢買難受。再咁落去，被人徹底唾棄係遲早問題咋。
百年養不足，一日毀有餘。幾代人辛苦經營嘅金漆招牌，回歸後極速褪色，國泰絕對唔係唯一例子。有人話國泰係香港嘅縮影，雖不中亦不遠喇。