上樓承諾大隻講 公屋輪候頸都長

房委會尋日公布最新公屋申請數字同平均輪候時間，截至今年六月底，大約有十五萬零六百宗一般公屋申請，數字雖然比三月少大約二千幾宗，最弊係平均輪候時間竟然不減反增，由五點一年變成等五點三年至上到樓，簡直離晒大譜。非長者一人申請嘅情況亦唔好得幾多，宗數冇錯係少咗大約一千宗，但平均輪候時間由等二點八年變成要等二點九年。有人話以特區政府嘅房屋政策嚟睇，上樓時間唔使等出年，今年就可以「登六」，絕對唔係危言聳聽。

大家有眼見，港府之前都仲將公屋「三年上樓」目標掛喺嘴邊，但隨着上樓時間不斷創新高，官老爺自己都唔好意思再出口術氹市民。不可不知，五點三年其實只係官方數字，等足六年甚至十年都上唔到樓嘅，實際上大有人在。

最諷刺嘅係，無殼蝸牛望穿秋水都等唔到個公屋單位，南亞假難民反而可以輕鬆佔領深水埗鬧市天橋底，自成一角，不知幾自在。港府既然對南亞兵團隻眼開、隻眼閉，不如索性一視同仁，開放各區橋底，甚至開放禮賓府、門常開畀公屋輪候冊市民，解決過渡性房屋需要，點都好過睇住港人同胞慘到要住劏房，甚至瞓豬欄吖，下話。

講嚟講去，一日最衰都係班港產庸官眼高手低。林鄭房策畀人話師承曾蔭權爵士，一味淨係識耍虛招博掌聲，資助房屋與市價脫鈎等「娥六招」固然無助打擊樓價，增加土地供應亦同前朝一樣毫無寸進，就講未來五個年度嘅公營房屋建屋量，統統都達唔到平均每年二點八萬個嘅目標，公屋輪候冊唔長過萬里長城至奇。咪畀人批死，喺僧多粥少愈來愈嚴重嘅情況之下，公屋輪候時間只會愈來愈長，「入五」、「登六」都對林鄭班子管治能力太過樂觀，直頭「奔七」就差唔多。

退一步講，即使有新公屋落成又點吖，港府咪又係攞去做綠置居發售。當局話就話綠置居只准公屋租戶購買，原有嘅單位騰空出嚟畀公屋輪候人士，問題係公屋供應無增加，個餅就係得咁大，到頭來無非又係朝三暮四、朝四暮三嘅把戲，官老爺以為用咁嘅語言偽術就可以愚弄公眾，未免太侮辱市民嘅智慧啩。

所以話啫，港府拓土建屋不力，唔敢郁權貴嘅私人遊樂場用地同新界棕地，又任得政府宿舍閒置，冇地起公屋之餘，上樓目標又大隻講，輪公屋班基層條頸有乜法子唔長過長頸鹿吖。