政務司前司長唐英年預早撐林鄭連任，即使她任期未滿一年，唐唐已積極鼓勵佢爭取連任多做五年；理由一大堆，話林鄭「開局開得好」。一般人如老朽者只感覺佢「開局吹得好」，一時又「管治新思維」，一時又「懷着一直以來都無變的初心，多加一份謙卑，期盼與各位同行，以關心、聆聽、行動、建設一個更美好的香港！」然而，林鄭上任以來，並沒有為港人燃點希望，不是嗎？家陣衣食住行樣樣難，增加土地供應又係得把口；社會怨氣積聚更加深，老朽真係睇唔到佢做咗乜鬼嘢令香港更美好？
至於唐英年話非常滿意林鄭過去一年嘅表現，指佢積極修補香港社會的撕裂，「連教協酒會都肯去」；好出奇咩？早前佢親率多名高官出席民主黨黨慶酒會，仲即場認捐三萬大洋並在Instagram貼出「大和解」等標籤。不過，與反對派「同行」，老朽睇唔到社會變得和諧！反對派在議會依然鬧事，「修補撕裂」恐怕是「自我感覺良好」多於一切。
真正要去做嘅係深入罪惡淵藪，最簡單的例子是香港自詡「法治之區」，可惜庇奸護淫，港府恐洋懼外深入骨髓，是以打黑除惡看似雷厲風行，實則雷聲大雨點小，司法甘當其保護傘，試問怎可能除惡務盡！講真，連涉刑恐東方記者單案，明明證據確鑿，律政司拖咗一年多仍唔敢告黎智英，林鄭仲話執行力強，講出來盞羞家！所謂「政策前瞻」，是否瞻之在前，忽焉在後，飄忽過鬼影變幻球，總之，你估我唔到就可以扮世外「高人」？
衰世無道，正義不彰，邪說橫行。林鄭也不過透露上任近一年，感時間過得很快，形容是「度月如日」，感覺享受及有滿足感。唐英年呢位金句王即撲出來助拳撐連任，老朽感覺佢如蚊子要哼哼發一篇大議論使人感到討厭。金句王身為全國政協常委，咪咁「思近而問切，志篤而學博」啦，快戒咗「吊吊揈」陋習。