隨着全國人大常委會一錘定音，高鐵香港段實施一地兩檢安排可以話大局已定，用副秘書長李飛嘅話形容，就係「一言九鼎」。不過咁，你有你「一言九鼎」，反對派有反對派「一言九頂」，有個乜鬼關注組尋日去西九總站遊行，結果場面冷清，淪為名副其實嘅「四五行動」，示威變示弱，簡直笑大人個口。
即係咁，反對派逢中必反，逢中港融合必反，對於一地兩檢，點都要搞場大龍鳳向幕後老闆交功課。特別係立法會議事規則修改後，反對派拉布唔係咁易；依家人大拍咗板，司法挑戰睇怕亦唔work，路路唔通咯喎，咪惟有搞街頭運動囉。呢，出年元旦遊行冇乜賣點，有政客呼籲支持者上街「反對割地兩檢」，咪畀人睇死，到時咪又係得小貓三、四隻。
最諷刺嘅係，反對派當初口口聲聲一地兩檢係「民意戰」，咁多次民調都顯示支持嘅市民佔大多數，依家「群眾運動」又冇人騷，一味靠嚇又搞出個林子健自編自演嘅鬧劇，敗軍之將，何足言勇，疊埋心水返屋企瞓覺罷喇！
市民嘅眼睛係雪亮嘅，唔似得班政棍咁一個二個腦子進水。係人都知，一地兩檢係便民措施，外國早有先例，同政治根本大纜扯唔埋；再講吖，相關安排喺深圳灣口岸行之有效，班政棍早唔出聲遲唔出聲，依家至嚟呱呱嘈，呢啲唔係雙重標準，龍門任搬又係咩吖！
講真，反中政客搞搞震就話心裏有鬼，搭個高鐵都驚畀人拉啫，每日來往中港兩地嘅港人數以十萬計，幾時見過有人無喇喇出事o架。反對派無事生非，阻住地球轉，為咗自己政治利益而剝奪廣大市民出行便利，點止騎劫咁簡單，直頭係與民為敵，結果咪畀人鬧爆囉。
學李飛話齋，如果有人覺得唔放心，可以用其他口岸返內地，可以唔坐高鐵，咁就唔使怕一地兩檢，但只要知道邊樣方便，邊樣唔方便，到時當事人就會心知肚明。冇錯嘞，有啲人明明嘴裏說不，身體卻很誠實，好似嗰位白鴿黨議員咁，反高鐵反一地兩檢嗌到聲嘶力竭，點知一個屈尾十竟然喺地區舉辦「高鐵四天逍遙遊」，神又係佢，鬼又係佢，直頭精神錯亂，而正正因為未有一地兩檢，個團朝頭早六點鐘就要集合，出發去深圳北站搭高鐵北上，幾咁辛苦。以後西九站實施一地兩檢，街坊咪唔使再倒塔咁早起身咁操勞囉！
江山易改，本性難移，反對派嚟緊肯定會繼續無所不用其極搞搞震。不過嘥氣喇，一地兩檢大局已定，繼續搗亂，同蚍蜉撼大樹一樣咁可笑。