聖誕新年期間，唔少人都會一家大細外遊充吓電，不過玩還玩，始終都係安全至上，特別係航空公司，更加唔可以亂咁揀，否則有乜依郁分分鐘嚇餐飽，同搵命博冇乜分別嘅咋！
話說國泰航空前日一班由香港飛東京嘅航班，喺飛行途中懷疑有零件脫落，結果搞到成田機場一度封鎖跑道進行搜索，話就話好彩冇人受傷，而國泰方面亦死撐，強調有關零件並唔係航機配置裝備需求清單上嘅規定組件，唔會影響航班運作，但正如立法會議員話齋，飛行安全大過天，航空公司有責任喺起飛前及降落後仔細檢查所有零件，而唔係藉口多多，大事化小，粉飾太平。冇錯嘞，意外嘅嘢，唔怕一萬，最怕萬一，航空公司派幾多定心丸都係假，試吓佢哋班高層搭呢班機吖，飛飛吓跌咁件零件落嚟，飛飛吓機艙冒黑煙，睇吓佢哋仲有冇咁老定！
話時話，國泰嘅安全事故多到三日三夜都數唔晒，未爆大鑊只可以話係好彩。本報計過數，連埋新鮮滾熱辣呢一單，國泰今年最少發生十七宗安全事故，舊年更加有成廿二宗，前年亦有十九宗，引擎故障、擋風玻璃出現裂痕、起落架故障、信號故障錯誤顯示機門未關，無奇不有，鑊鑊新鮮鑊鑊甘。國泰航機久唔久上演一場九霄驚魂，好似本月初一架由美國芝加哥飛返香港嘅航機，駕駛艙居然半路中途冒煙，搞到要優先降落，乘客飽食驚風散。見過鬼怕黑，唔怪得愈來愈多人話以後都唔搭國泰喇。
國泰安全得人驚，服務更加係有口皆悲。淨係延誤多過食飯，成日搞到旅客大失預算，已經係人都買佢怕。至於國泰超賣機票，更加搞到天怒人怨，佢哋為求賺到盡，不惜當乘客豬仔咁賣，淪為機場難民都闊佬懶理。最離譜嘅係，國泰店大欺客，講到要賠償，除非閣下係名人又或者向本報投訴，否則該公司例牌側側膊唔多覺，話香港勝在仲有第四權，就係咁解。
正所謂，有諸內形於外，國泰服務之所以不斷插水，皆因管理爛到入心，高層錯誤決策炒燶期油，反而肥上瘦下，大手裁減前線員工，士氣低落之下，三日唔埋兩日有工業行動，服務又點會好吖。依家國泰個朵已經臭晒，一提「因航」，大家都知係「因管理不善在全球最佳航空公司排名榜中節節下跌嘅國泰航空」嘅簡稱。
百年養不足，一日毀有餘。國泰曾幾何時係「香港人嘅航空公司」，係港人之光，淪落到今日咁，排名暴跌，乘客唾棄，業績見紅，連恒指成分股地位都不保，繼續不思進取，睇怕仲有排衰吖！