瘟神好行夾唔送！入境處前日安排包機遣返六十八名越南籍非法入境者回國，當中一半係免遣返聲請人，亦係港府十七年來首次用包機遣返大批滯港人士。
一班包機要使幾多錢？入境處官員冇正面回應，淨係形容價錢「合理」。按常理計，呢筆數應該由越南政府埋單，但唔理點都好，假難民姦淫擄掠，無惡不作，送走多一件，社會少一個計時炸彈，就算最終真係納稅人貼錢，總算物有所值。再講吖，之前部分法官「慈悲為懷」，向假難民發放大筆「賠款」請佢哋走路，比起呢筆冤枉錢，包機分分鐘除笨有精。
正所謂，遲到好過冇到，本報長期以來鍥而不捨發揮第四權精神，要求即時遣返假難民，入境處從善如流，主動出擊，努力值得肯定，最緊要係持之以恒，以後多啲嚟密啲手。不過話又講番轉頭，安排包機由招標到處理遣返人士證件，到同對方國家政府協商，再到協調航班，過程相當繁複，連入境處官員都承認「來之不易」，而且一次運得嗰幾十人，相對超過一萬滯港假難民嚟講，連杯水車薪都講唔上。
不可不知，今次遣返嘅越南人全部都係自願，至於其餘賴死唔走嗰啲，當局可以話係冇晒符。之前試過強制遣返，結果對方又拒捕又逃走，搞到一褲都係，問你怕未。冇錯，近年當局增加人手、簡化免遣返聲請審核程序，積壓個案的確比之前明顯減少，問題係完成審核程序唔等於完成遣返程序，超過九成聲請被拒嘅假難民申請上訴，你知喇，假難民既有法援呢條大水喉射住，又有「假難民之父」之流嘅「人權鬥士」撐腰，更有識法律嘅政棍同無良業界教路，令官司更加曠日持久，結果一來一回，滯港假難民人數同舊年維持同一水平，簡直吹脹！
事實勝於雄辯，有假難民滯留香港超過十年；有啲落地生根，組織家庭繁衍後代；有啲甚至出出入入，將香港當時鐘酒店，鍾意就嚟着草避債，鍾意就嚟逃避仇家，咁搞法，安排幾多包機，增加幾多資源審核都係嘥氣。所以話啫，要杜絕假難民禍港，治本之道始終係退出國際難民公約，一了百了，最低限度都要重設禁閉式難民營，減少假難民來港食大茶飯嘅誘因。
有人就講得啱嘞，香港嘅假難民十個着咗十個唔係嚟自戰亂國家，反而最大來源地嘅越南被譽為「新亞洲四小龍」；另一大戶印度更加係全球最大民主國家，港府作為反對派口中嘅「極權政府」，仲學人「政治庇護」喎，咪盞笑大人個口！