懶官僚藥石亂投 急症室逼爆依舊

除夕倒數,維港兩岸塞滿慶祝群眾,不過唔講大家可能唔知,香港地仲有一個地方一樣咁「熱鬧」,邊度?之唔係各區公立醫院嘅急症室囉!

唔係誇張o架。本港即將進入冬季流感高峰期,唔少公院病床佔用率超過百分之一百,「重災區」嘅博愛醫院同埋伊利沙伯醫院,比率更加一度接近百分之一百二十,睇急症閒閒哋要等超過八粒鐘,小病隨時拖成大病,問你點頂。如果唔係天可憐見,呢幾日氣溫回暖,患病者減少,急症室肯定逼多兩錢重。

講真,公院病床超負荷,急症室逼爆,呢啲都係老大難問題。正如「東方報業民意調查」顯示,絕大部分受訪者擔心病房爆滿為流感防疫敲響警號,應變不足會禍延病人;亦有唔少市民狠批醫管局束手無策,以致亂象周而復始。

咦,咪住。港府早排大手加急症室收費八成,去到一百八十元,唔係話可以減少市民「濫用」急症室嘅習慣,將部分病人「分流」到私營醫療市場,從而紓緩逼爆情況嘅咩?家陣事實一巴二巴摑埋去官僚塊面度,所謂「加價分流」嘅策略,根本係自欺欺人!

好簡單啫,好人好姐邊會有人貪過癮走去睇急症,所謂「濫用」只係少數,再講吖,急症室有專業醫護把關,甄別非緊急個案,家陣一刀切加收費用,等於變相懲罰真正有需要嘅病人。至於話「分流」到私家醫院囉喎,正如唔少市民話齋,加價後仍然比私院平一截,所以畀貴啲都要焗住繼續用公院服務。退一步講,就算公院急症室收費加至同私院睇齊,私院又會跟風加價,到頭來又係搵着小市民嚟搞。

係人都知,公營醫療系統資源人手長期不足,先至係問題癥結所在,官老爺一味加價,同頭痛醫腳,腳痛醫頭冇乜分別。道理一字咁淺,官老爺唔係唔明,只不過係懶到出汁,一味推卸責任。

咁就難怪港府咁鍾意搞「用者自付」、「寓禁於徵」,除咗急症室加費,透過咪錶位以及牛肉乾加價,解決道路擠塞問題,都係出自同樣思路。一方面係私家車數目十年間大增超過四成,另一方面係泊位同車輛比例不升反跌,當局唔增加泊位供應又或者限制車輛增長,卻一味加費加罰則,根本就係捨本逐末,結果只會喺增加市民負擔之餘,進一步推高私人停車場費用以至助長車位炒風,港府成日畀人話傾斜商界,依家知點解喇。

港府坐擁金山銀山,叫佢開倉濟民牙痛咁聲,反而打劫市民荷包鬼打冇咁精神,咁嘅特衰政府,全世界都幾難搵第二個!