民以食為天，食以安為先。食物安全關乎市民健康，監管必須嚴之又嚴，慎之又慎，港府建議修訂食物重金屬含量標準，本來係好事，點知當局居然反世界潮流而行，規管唔係收緊而係放寬，有冇再離譜啲吖。
唔係講笑，現時規管食物重金屬含量嘅《食物攙雜（金屬雜質含量）規例》，自八三年至今冇修訂過，早就不合時宜，港府去年建議修例加強規管，涵蓋項目由十九個勁增至一百四十五個，本來係應有之義，殊不知建議之中，大部分標準係就係較以往嚴格，但有小部分居然放寬，其中白米鎘含量仲由原本每公斤○點一毫克，放寬一倍至每公斤○點二毫克，唔止係開倒車，直情係搵市民健康較飛喇。
聽吓港府點解釋吖。當局話喎，放寬白米鎘含量標準係因應港人飲食習慣而定，仲話新標準已較國際食品法典委員會嚴緊，同內地標準睇齊。仲有呀，目前全球只有香港、澳洲及新西蘭採用高標準，冇證據證明放寬標準會令市民健康受損，再加上市面九成九白米樣本鎘含量少於每公斤○點一毫克，就算放寬標準都冇有怕喎。
呢啲咪叫官字兩個口囉。食品安全點強調都唔過分，安全標準只會愈收愈緊，冇可能愈修愈寬，如果真係冇問題，又唔見澳洲同新西蘭跟隨？既然本港白米幾乎全部符合高標準，為咗嗰一個巴仙而降低規管，都好戇居啫。冇錯，歐盟對白米嘅監管的確比香港寬鬆，弊在白米唔係歐洲人主糧，反而香港人無飯不歡，何況係人都知重金屬有損肝腎功能，連消委會都表明反對，港府依然一意孤行，話冇古怪都冇人信喇。
呢，話口未完啫，就有消息人士承認放寬標準係為咗配合世界貿易組織，事關香港係成員之一，若標準較其他地方嚴謹，需要解釋喎，家陣明白晒喇。所以話啫，港府唔止施政向財團傾斜，連食安標準都要買入口商嘅怕，到底係福為民開定係福為商開，仲使問嘅。
真係諗極唔明，本港食安警鐘長鳴，唔係孔雀石綠魚，就係蘇丹紅蛋；唔係過期肉，就係哮喘豬；唔係黑心油，就係農藥菜，問題層出不窮，點解港府仲未知驚？一場鉛水風波已經搞到市民提心吊膽，聞重金屬色變，港府仲唔吸取教訓，唔通真係食懵咗？
講起就唏噓，今時今日嘅香港，衣食住行皆不易，生老病死樣樣難，由空氣到食水再到食物都有問題，當局仲要降低白米鎘含量標準，即係靠害市民嘅咋。港產官僚好學唔學，好做唔做，香港由國際城市淪為第三世界，都係差遲早咯。